AQSH Federal tergov byurosi (FTB) xalqaro sheriklari bilan xavfli dastur bilan zararlangan xalqaro kompyuterlar tarmog‘ini bartaraf etdi. Uning yordamida Rossiya maxsus xizmatlari kamida 50 ta, jumladan, NATOga kiruvchi davlatlar, shuningdek, jurnalistlarning maxfiy ma’lumotlarini qo‘lga kiritib kelgan.
AQSH Adliya vazirligi bayonotida qayd etilishicha, gap Snake zararli dasturi haqida ketmoqda. Amerika hukumatining ma’lumotlariga ko‘ra, dasturni Rossiya Federal xavfsizlik xizmatining 16-markazi bo‘linmasi ishlab chiqqan.
“Sud hujjatlarida Turla deb keltiriladigan mazkur bo‘linma 20 yil davomida Snake’ning turli versiyalaridan foydalangan holda dunyoning kamida 50 ta, xususan Shimoliy Atlantika alyansiga kiradigan davlatlardagi yuzlab kompyuterlardan maxfiy ma’lumotlarni o‘g‘irlab kelgan”, — deyiladi idora bayonotida.
Qo‘lga kiritilgan ushbu hujjatlar “maxfiy tarmoq” orqali zararlangan kompyuterlar orqali jo‘natilgan. Tergov xulosasiga muvofiq operatsiyani FXXning Ryazandagi boshqarmasi nazorat qilgan.
FTB josuslik dasturini maxsus xizmat tomonidan yaratilgan Perseus dasturi yordamida o‘chirgan — u “zararli Snake’ni hayotiy muhim komponentlarini qayta yozishga majburlovchi buyruqlarni bergan”.
Izoh (0)