“Daryo” internet nashrida “Uyini sel bosgan nogiron fuqaro hokimiyatdan yordam so‘radi. Hokimlik odatda o‘z zimmasida bunday majburiyat yo‘qligini aytmoqda”, sarlavhali maqola eʼlon qilingandi. Kitob tumani hokimligi mazkur maqolaga munosabat bildirib, sel suvi fuqaro xonadoniga emas, molxonasi va qo‘yxonasiga zarar berganini maʼlum qildi.
“Fuqaroning mazkur murojaati tuman hokimligi tomonidan nazoratga olindi hamda hokimlik huzurida tezkor ishchi guruh tuzilib, voqea sodir bo‘lgan manzilga yuborildi. Fuqaro Habibulla Madiyevning yashash xonadoni ko‘zdan kechirilib, murojaat egasi bilan suhbat o‘tkazildi. O‘rganishlar davomida 2022-yil noyabr oyi boshlarida yuz bergan sel toshqini murojaatchining yashash xonadoniga hech qanday talafot yetkazmaganligi, zarar uyning yordamchi binolari — molxona hamda qo‘ylar saqlanadigan kichik qurilish obyektlariga taʼsir etganligi aniqlandi”, — deyiladi hokimlik rasmiy munosabatida.
Hokimlik ishchi guruhi shuningdek, fuqaroga tegishli xonadonning hujjatlarini ham ko‘zdan kechirgan.
“Xonadon egasining uy hujjatlari o‘rganilganida fuqaroning ayni vaqtda foydalanib turgan jami yeri 21 sotix ekani, faqatgina 6 sotixi qonuniy ekani aniqlandi. 2019-yil 1-aprelda Vazirlar Mahkamasining 461-sonli qarori qabul qilingan bo‘lib, qaror ijrosini ta’minlash maqsadida Kitob tumani hokimining X-1105/04-son qarori chiqarilgan. Mazkur qarorda ham xonadon egasi egallab turgan 15 sotixdan ortiq yer maydoni tuman zaxira yer fondiga qaytarilishi belgilangan. Lekin fuqaro shu vaqtga qadar ushbu yerdan doimiy foydalanib kelayotganligi, aslida ushbu yer sel toshqini yo‘lida joylashganligi, tabiiy ofat zarar yetkazgan molxona binolari ham aynan shu yerda qurilganligi aniqlandi. Va bu bo‘yicha murojaatchiga tushuntirish ishlari olib borildi”, — deydi hokimlik masʼullari.
Qo‘shimcha qilinishicha, tuman hokimligi va tuman FVB bilan hamkorlikda sel oqimlari yuz berishi mumkin bo‘lgan hududda yashovchi fuqarolar hayoti va xavfsizligini ta’minlash maqsadida alohida chora-tadbirlar ishlab chiqishni belgilagan.
“Fuqaroning ijtimoiy holati inobatga olinib, unga amaldagi qonunlar boyicha tegishli amaliy yordamlar berilishi ma’lum qilindi”, — deyiladi hokimlik munosabatida.
Izoh (0)