Qashqadaryo viloyatining Kitob tumanida yashovchi fuqaro Habibulla Madiyev “Daryo”ga murojaat qilib, 2022-yilning noyabr oyida uyini sel suvi bosganini, ancha zarar ko‘rgani sabab nogironligini aytib, tuman hokimidan najot so‘rab borgach, hokim yordam berishni vaʼda qilganiga qaramay, vaʼdasini bajarmaganini aytmoqda.
“2022-yilning 4-noyabr kuni Kitob tumanining Yuqori Ayoqchi qishlog‘iga sel kelib, mening uyimni, tomorqamni loyqa, tosh va axlatga to‘ldirib tashladi. Shundan so‘ng 10-noyabr kuni xalq qabulxonasiga murojaat qilib, yordam so‘radim. Odam boradi va o‘rganib chiqib, xulosa qilinadi, deyishgandi. Lekin hech kim bormadi.
17-noyabr kuni yana Xalq qabulxonasiga murojaat qildim. Qabulda shaxsan hokimning o‘zi meni qabul qilib, mutaxassilarni jo‘natamiz, borib o‘rganadi, dedi. Shundan so‘ng ham hech kim bormadi. 24-noyabr kuni takroran yana hokimga murojaat qildim. Hokim yana qayta-qayta murojaat qilsang, bir og‘iz gapirsang, lavozimdan qaytaman, xonamdan chiqarib yuboraman, dedi.
Qabuldan so‘ng, ertasi kuni 25-noyabr kuni Bahodir To‘rayev boshchiligida masʼullar uyimga kelib, vaziyatni o‘rganishdi. Blok g‘isht, 20 dona shifer, stropila beramiz, shuningdek, 4 sotix yer ajratib, uy qurib beramiz deb ketishdi. Lekin shu paytgacha hech qanday natija bo‘lmadi”, — deydi ikkinchi guruh nogironi ekanini aytgan fuqaro.
.jpg)
Fuqaroning aytishicha, hokim vaʼda berib, vaʼdasini bajarmagach, bu haqda jamoatchilikka murojaat qilishga majbur bo‘lgan.
“Hokimning shaxsan o‘zi vaʼda bergandi. Bo‘ldi, hamma joyga murojaat qilish shart emas. Vaʼda berdim, qilib beramiz degach, hokimga ishongandim. Lekin vaʼda vaʼdaligicha qolib ketdi”, — deydi u.
“Daryo”ning bu haqdagi so‘roviga javob bergan Kitob tumani hokimligi axborot xizmati rahbari Qahramon Oqilov odatda hokimlik bunday ishlarni homiylar ko‘magi yordamida amalga oshirishini, hokimiyatda uyini sel bosgan fuqaroning uy-joyini taʼmirlab berish majburiyati yo‘qligini aytmoqda.
“Aholining uy-joyiga talafot yetkazilganida hokimlikning moddiy yordam ko‘rsatishi qatʼiy belgilanmagan. Lekin insonparvarlik jihatidan olib qaralganda, kengash qarori orqali yordam ko‘rsatilishi mumkin. Shunda ham uyning kadastr hujjati bo‘lsa. Agarda uy o‘z nomida bo‘lmasa, hech qanday yordam ololmaydi”, — deydi Qahramon Oqilov.
Izoh (0)