Qashqadaryo viloyatining Qarshi shahrida yashovchi fuqaro “Daryo”ga murojaat qilib, auksion savdo orqali salkam 230 million so‘mga ko‘p qavatli uydan xonadon sotib olganini, ammo qonuniy auksion g‘olibi bo‘lishiga qaramasdan uyga egalik qilolmayotganini aytmoqda.
“Biz qarzdorlik evaziga xatlangan va auksion savdoga qo‘yilgan ko‘p qavatli uydagi xonadonni auksion savdoda qatnashib, 229 million 545 ming so‘mga sotib oldik va pulini o‘z vaqtida to‘ladik. Lekin uyni olganimdan so‘ng, MIB xodimi uyni egasidan olib berolmasligini, boisi auksion savdo bo‘layotgan paytda uy egasi boshqa bir inson bilan kelishib, uyni sotib yuborganini aytdi. Biz savdo bo‘layotgan paytda qanday qilib, uy egasi o‘zboshimchalik bilan uyni sotib yuborishi mumkinligini, savdo davom etayotganda bunday harakatlar to‘xtatilishi kerakligini aytdik. Ammo natija bo‘lmayapti. Auksionning qonuniy g‘olibi bo‘lsam-da, haligacha uyni ololmayapman”, — deydi bu haqda tahririyatga murojaat qilgan Husanjon Shamsiyev.
Murojaatchi O‘zbekiston prezidenti tomonidan 2017-yil 27-iyul kuni imzolangan qarorga ko‘ra, auksion natijalari haqidagi bayonnoma oldi-sotdi kuchiga ega bo‘lib, mol-mulkni taqiqdan yechish, uni auksion g‘olibiga topshirish, shuningdek, g‘olib nomiga mulkni, mulk huquqini va boshqa mulkiy huquqlarni ro‘yxatdan o‘tkazish uchun asos hisoblanishini aytmoqda.
“Shuningdek, O‘zbekiston Respublikasi Vazirlar Mahkamasining 2022-yil 12-yanvardagi Qarori bilan tasdiqlangan nizomning 46-bandiga muvofiq mazkur bayonnoma oldi-sotdi shartnomasi kuchiga ega bo‘lib, mulk va mulkiy huquqni davlat ro‘yxatdan o‘tkazish uchun asos hisoblanadi-ku”, — deydi u.
Husanjon Shamsiyev Qarshi shahrida mazkur vaziyat bo‘yicha masʼullar prezident va Vazirlar Mahkamasi qarorlarini tan olmayotganini aytmoqda.
“Fuqarolarning qonuniy manfaatlariga bepisand muomalada bo‘lishayotgani achinarli. Ayrim davlat tashkiloti xodimlarining hukumat qarori ijrosiga befarqlik va loqaydlik qilishi oqibatida biz kabi fuqarolarning muammolari ko‘paymoqda. Yuqori tashkilotlarga murojaat qilishimizga sabab bo‘lmoqda”, — deydi murojaatchi.
Aniqlanishicha, Husanjon Shamsiyev 2023-yil 24-mart kuni onlayn “E-auksion” savdoda qatnashib, lot raqami №4713163 bo‘lgan Qarshi shahar “Roguzar” mahallasi Islom Karimov ko‘chasida joylashgan 497-uyning 7-xonadonini sotib olgan.
“Bizdan oldinda turgan auksion g‘olibi belgilangan muddatda uy pullarini to‘lamaganligi sababli uyni onlayn auksionda menga taklif qilishdi va men pullarni to‘liq to‘ladim. Auksion natijalar to‘g‘risidagi bayonnoma berildi. Bayonnomani olib Qarshi shahar Majburiy ijro byurosiga borsam, ijro xodimi Abbos Yoqubov uyni olib berolmasligini aytdi. Sababini so‘raganimda uyning egasi auksionda birinchi g‘olib bo‘lgan fuqaro bilan o‘zaro kelishib uyini sotganini aytdi”, — deydi murojaatchi.
Fuqaroning aytishicha, auksion savdo o‘tayotgan paytda 2023-yilning 19-aprel kuni uy egasi uyini yashirincha sotib yuborgan.
“Uy auksion savdoga qo‘yilganini bank va MIB xodimlari bilmasdimi? Yoki uyni sotishga qo‘yilgan taqiqni ko‘chadan kelgan boshqa inson yechganmi? Bank va MIB xodimlari auksion jarayoni ketayotganini bila turib, nima uchun noqonuniy ish qildi? Davlatimiz rahbari va Vazirlar Mahkamasi tomonidan chiqarilgan qarorlarni bank va MIB tan olmaydimi? Yoki qandaydir manfaat turibdimi? Prezidentimizning 2019-yil 26-avgustdagi PQ-4427-sonli qarorida ham ‘auksion g‘olibi aybi bo‘lmagan taqdirda, maʼmuriy tartib-taomillarga rioya qilinmaganligi uchun elektron onlayn-auksion natijalari to‘g‘risidagi bayonnomani bekor qilish yoki o‘zgartirishga yo‘l qo‘yilmaydi’, deb belgilab qo‘yilgan-ku”, — deydi Husanjon Shamsiyev.
“Daryo” voqealar rivojini kuzatishda davom etib, masʼullardan tayinli javob kutadi.
Izoh (1)
Bularni kuchi oddiy fuqarolarga yetadi