UzAuto Motors 2021-yilda bir qancha isteʼmolchilar bilan Captiva 5 avtomobilini yetkazib berish bo‘yicha shartnomalar tuzgan. Lekin maʼlum muddat o‘tganidan keyin mazkur rusumdagi avtomobillarni sotish to‘xtatilgan. Sabab sifatida Captiva 5 ning O‘zbekiston iqlimiga to‘g‘ri kelmasligi aytilgan. UzAuto Motors‘ning bu daʼvosidan norozi bo‘lgan isteʼmolchi O‘ktam Qahhorov qonuniy haq-huquqlari talabida sudga murojaat qilgan.
O‘ktam Qahhorov 2021-yil oktabrda Chevrolet Captiva 5 uchun pul to‘lab, avtomobilini shu paytgacha ololmay, UzAuto Motors va uning dilerlik markazidan sud orqali shartnoma shartiga ko‘ra mashinani yetkazib berishni talab qilib kelmoqda. Bu masalada bir necha marta sud jarayonlari bo‘lib o‘tgan. UzAuto Motors sudda yutqazgan. Ammo jarayon yana cho‘zilib, hozirgacha davom etayotgandi.
Sobiq deputat, Tabiat resurslari vaziri masalahatchisi Rasul Kusherbayev Telegram’dagi kanalida xabar berishicha, Oliy sud yakuniy sud majlisida ham Qahhorov foydasiga qaror chiqarib, kompaniyaga Captiva 5 ni isteʼmolchiga yetkazib berish majburiyatini yukladi.
“Sud qarori bo‘yicha ijro harakatlari boshlanganda UzAuto Motors’chilar ijroni to‘xtatib, Oliy sud raisiga takroriy kassatsiya keltirishni so‘rab ariza kiritgandi. Oliy sud raisi bu ishni qayta ko‘rib chiqishga asos yo‘q, deb arizani qaytargan. Biroq, kutilmaganda mazkur masala bo‘yicha bosh prokuror o‘rinbosari S.Artikova Oliy sudga takroriy kassatsiya tartibida ko‘rib chiqish UzAuto Motors’ning yonini olib, protest keltirgandi. Isteʼmolchi emas, monopolistning yonini olib protest kiritgan bosh prokuror o‘rinbosarining bu harakati ochig‘i meni ham xafa qilgan.
Va nihoyat, bugun takroriy kassatsiya tartibida S.Artikovaning protestini ko‘rib chiqqan Oliy sud sudlov hayʼati protestni rad qilish haqida qaror qabul qildi. Shu tariqa monopolist kompaniya uchun baxona qiladigan, osiladigan boshqa joy ham, teshik ham qolmadi. Kompaniya qanday bo‘lmasin sud qarorini ijro etib, isteʼmolchiga vaʼda qilingan Captiva 5 avtombilini yetkazib berishi kerak vassalom. Sud qarorlarini ijro qilish barcha, shu jumladan, UzAuto Motors uchun ham majburiy”, — deb yozadi vazir maslahatchisi.
“Biz faqat bir narsani, yaʼni monopolistga kelganda ham qonunlar ishlashini, sud qarori ijro qilinishini istaymiz xolos. Fuqaro foydasiga kelganda ham qonunlar ishlasin”, — deya qo‘shimcha qiladi sobiq deputat.
“Buyog‘iga endi qonunlarning ishlashini kutamiz. Isteʼmolchilar foydasiga chiqqan qarorlar kamdan kam bo‘ladi”, — deydi O‘ktam Qahhorov.
Eslatib o‘tamiz, UzAuto Motors Chevrolet Captiva 5 avtomobillarini yetkazib berish bo‘yicha shartnomalar tuzishni 2021-yil 20-noyabrda to‘xtatgan. Bunga sabab sifatida jahon bozorida yarimo‘tkazgich mikrochiplar yetishmayotgani keltirilgan.
Izoh (0)