“Дарё” интернет нашрида “Уйини сел босган ногирон фуқаро ҳокимиятдан ёрдам сўради. Ҳокимлик одатда ўз зиммасида бундай мажбурият йўқлигини айтмоқда”, сарлавҳали мақола эълон қилинганди. Китоб тумани ҳокимлиги мазкур мақолага муносабат билдириб, сел суви фуқаро хонадонига эмас, молхонаси ва қўйхонасига зарар берганини маълум қилди.
“Фуқаронинг мазкур мурожаати туман ҳокимлиги томонидан назоратга олинди ҳамда ҳокимлик ҳузурида тезкор ишчи гуруҳ тузилиб, воқеа содир бўлган манзилга юборилди. Фуқаро Ҳабибулла Мадиевнинг яшаш хонадони кўздан кечирилиб, мурожаат эгаси билан суҳбат ўтказилди. Ўрганишлар давомида 2022 йил ноябрь ойи бошларида юз берган сел тошқини мурожаатчининг яшаш хонадонига ҳеч қандай талафот етказмаганлиги, зарар уйнинг ёрдамчи бинолари — молхона ҳамда қўйлар сақланадиган кичик қурилиш объектларига таъсир этганлиги аниқланди”, — дейилади ҳокимлик расмий муносабатида.
Ҳокимлик ишчи гуруҳи шунингдек, фуқарога тегишли хонадоннинг ҳужжатларини ҳам кўздан кечирган.
“Хонадон эгасининг уй ҳужжатлари ўрганилганида фуқаронинг айни вақтда фойдаланиб турган жами ери 21 сотих экани, фақатгина 6 сотихи қонуний экани аниқланди. 2019 йил 1 апрелда Вазирлар Маҳкамасининг 461-сонли қарори қабул қилинган бўлиб, қарор ижросини таъминлаш мақсадида Китоб тумани ҳокимининг Х-1105/04-сон қарори чиқарилган. Мазкур қарорда ҳам хонадон эгаси эгаллаб турган 15 сотихдан ортиқ ер майдони туман захира ер фондига қайтарилиши белгиланган. Лекин фуқаро шу вақтга қадар ушбу ердан доимий фойдаланиб келаётганлиги, аслида ушбу ер сел тошқини йўлида жойлашганлиги, табиий офат зарар етказган молхона бинолари ҳам айнан шу ерда қурилганлиги аниқланди. Ва бу бўйича мурожаатчига тушунтириш ишлари олиб борилди”, — дейди ҳокимлик масъуллари.
Қўшимча қилинишича, туман ҳокимлиги ва туман ФВБ билан ҳамкорликда сел оқимлари юз бериши мумкин бўлган ҳудудда яшовчи фуқаролар ҳаёти ва хавфсизлигини таъминлаш мақсадида алоҳида чора-тадбирлар ишлаб чиқишни белгилаган.
“Фуқаронинг ижтимоий ҳолати инобатга олиниб, унга амалдаги қонунлар бойича тегишли амалий ёрдамлар берилиши маълум қилинди”, — дейилади ҳокимлик муносабатида.
Изоҳ (0)