Malayziya Qashqadaryoda dorivor o‘simliklarni qayta ishlash loyihasini amalga oshirmoqchi

Malayziya kompaniyalari Qashqadaryo viloyatida dorivor o‘simliklarni qayta ishlash loyihasini amalga oshirish imkoniyatini o‘rganmoqda. 

Xabarga ko‘ra, Malayziyaning biologik faol qo‘shimchalar distribyutori — “Essentiq Pharma” kompaniyasi rahbariyati va Qashqadaryo viloyati Mirishkor tuman hokimi Sherali Sanayev boshchiligidagi ishbilarmon doira vakillari delegatsiyasi o‘rtasida uchrashuv tashkil etildi.

Uchrashuv avvalida Malayziya tomoniga Qashqadaryo viloyati, shu jumladan Mirishkor tumanini iqtisodiy-ijtimoiy rivojlantirish bo‘yicha amalga oshirilayotgan ishlar, tuman o‘sish nuqtalari va drayver tarmoqlari, shuningdek, O‘zbekistonda xorijiy investorlar uchun yaratilgan imkoniyatlar to‘g‘risida batafsil maʼlumot berildi. Tadbir ishtirokchilari uchun Mirishkor tumanining investitsion salohiyati to‘g‘risida alohida taqdimot o‘tkazildi.

Muloqot davomida tomonlar o‘rtasida o‘zaro hamkorlikni yo‘lga qo‘yish istiqbollari muhokama qilindi. Shuningdek, Malayziya kompaniyasi va o‘zbek delegatsiyasi tarkibidagi “Sam-Kuala” MCHJ korxonasi o‘rtasida Hamkorlik Memorandumini imzolash marosimi bo‘lib o‘tdi.

Malayziya kompaniyasi rahbariyati taklifiga binoan Mirishkor tumani delegatsiyasi “Essentiq Pharma” kompaniyasining hamkori, biologik faol qo‘shimchalar ishlab chiqarishga ixtisoslashgan “Biotropics Malaysia” kompaniyasining ishlab chiqarish korxonasiga borib, ish jarayoni bilan tanishdi.

Shuningdek, ishlab chiqarish faoliyati bilan tanishilgandan so‘ng, Mirishkor tuman delegatsiyasi va “Biotropics Malaysia” kompaniyasi rahbariyati o‘rtasida o‘zaro hamkorlik o‘rnatish, xorij tomoni ishtirokida Mirishkor tumanida qo‘shma investitsiya loyihasini amalga oshirish bo‘yicha muzokaralar o‘tkazildi.

“Biotropics Malaysia” kompaniyasi vakillari tomonlar o‘rtasidagi hamkorlikdan manfaatdor ekanligi, qo‘shma investitsiya loyihasini amalga oshirish imkoniyatlarini o‘rganib chiqishini maʼlum qildi.

Uchrashuvlar yakunida “Sam-Kuala” MCHJ va Malayziyaning “Essentiq Pharma” kompaniyasi o‘rtasida qo‘shma korxona tuzish va hamkorlik yo‘nalishlarini aniqlash maqsadida kompaniya rahbariyatining O‘zbekistonga tashrifini tashkil  etish, “Biotropics Malaysia” kompaniyasi bilan Mirishkor tumanida xorij tomoni texnologiyasi asosida qizilmiya o‘simligini qayta ishlash istiqbollarini o‘rganish maqsadida mazkur kompaniyaga qizilmiya o‘simligi namunalarini yuborish to‘g‘risida kelishuvlarga erishildi.