Qashqadaryo viloyatining Nishon tumani tashkil etilganiga 50 yilga yaqin muddat to‘lishi munosabati bilan amaldagi hokim Muxtor Hayitmurodov sobiq hokimlarni yod etdi. Ularning oila-aʼzolariga hurmat ko‘rsatib, bir dasturxon atrofida to‘pladi. Bu haqda “Daryo”ga hokimlik axborot xizmati rahbari Ilyos Mahmudov xabar berdi.
Taʼkidlanishicha, bugun, 9-may kuni tumanda “Inson aziz — xotira muqaddas” deb nomlangan tadbir bo‘lib o‘tgan.
Tadbirda so‘z olgan tuman hokimi Muxtor Hayitmurodov Nishon tumani tashkil etilganiga 2025-yilda 50 yil to‘lishini eslatib, tumanning bugungi kungacha bo‘lgan muvaffaqiyatlarida tumanga rahbarlik qilgan 7 nafar sobiq rahbarning ham hissasi katta ekanini taʼkidlagan.
.jpg)
“Nishon tumani tashkil topganiga 50 yil bo‘ldi. Ortda qolgan shu davr mobaynida Siz aziz nishonliklarning mehnatsevarligingiz, birdamligingiz, mardlik va jasoratlaringiz tufayli tumanimiz kundan-kunga rivojlanib, yangicha chiroy ochib bormoqda. Tumanning shu kungacha erishgan yutuqlarida sobiq hokimlar — Hayitmurod Farmonov, Hayit Joniyev, Ahmad Muqimov, Ravshan Xurramov, Orif To‘xtamishov, Rustam Sagdullayev, Asror Jo‘rayevlarning hissasi katta bo‘lgan”, — deydi tumanning ayni kundagi rahbari Muxtor Hayitmurodov.
“Daryo” muxbirining aniqlashtirishicha, 1990-yildan boshlab Nishon tumanida 9 nafar kishi hokimlik qilgan. Tumanning ayni kundagi rahbari Muxtor Hayitmurodovning ayni kundagi faoliyati ikkinchi hokimlik davri hisoblanib, Muxtor Hayitmurodov 2012-yildan 2016-yilgacha bo‘lgan muddatda ham tumanni boshqargan.
“Shu tumanga rahbarlik qilgan yillarimizda biz hokimlarda mablag‘ bilan bog‘liq muammolar bo‘lardi. Ko‘pincha o‘ylagan xayrli ishimizni, xalq uchun qilinishi kerak bo‘lgan yaxshi amallarimizni mablag‘ yetishmasligi sabab bajarolmay qolardik. Bugungi kunda tuman hokimlariga shaxsan davlatimiz rahbarining o‘zi so‘ragan mablag‘ini berib, natijani talab qilmoqda. Hozirda hokim bo‘lish masʼuliyatli bo‘lishi barobarida imkoniyatlar egasi bo‘lish hamdir. Xalq so‘rab kelgan muammoni yechish uchun shaxsan prezidentimizning o‘zi mablag‘ ajratib berayotganliklari hokimlar ishini osonlashtirmoqda. Shuning barobarida prezident bergan mablag‘ni o‘z joyida sarflashdek masʼuliyatni ham yuklamoqda. Bu borada Muxtor akaga havas qilamiz va omad tilab qolamiz”, — deydi Nishon tumaniga 1999—2000-yillarda rahbarlik qilgan sobiq hokim Ahmad Muqimov.
Tadbirda aytilishicha, Nishon tumanida rahbarlik qilgan sobiq hokimlarning ikki nafari — Hayitmurod Farmonov hamda Hayit Joniyevlar vafot etgan. Orif To‘xtamishov hamda Asror Jo‘rayev kabi sobiq rahbarlar ayni kunda vazirlikda, boshqarmalarda faoliyatini davom ettirmoqda.
Izoh (0)