Qozog‘istonning Olmaota shahri aholisi kana chaqayotganidan shikoyat qilmoqda. Bu haqda “Daryo”ning respublikadagi muxbiri xabar berdi.
Hozirgacha 350 dan ortiq fuqaro chaqish haqida xabar bergan, ulardan 187 nafari bolalardir. Bir kishida ensefalit aniqlangan. Shunga qaramay, kana chaqish holatlari o‘tgan yilning shu davriga nisbatan 1,5 baravarga kamaygan, 2022-yil 563 ta holat qayd etilgandi.
Profilaktika maqsadida shahar hokimiyati har yili kanaga qarshi tozalash ishlarini amalga oshiradi. Mart oyida 2,5 ming gektarga yaqin maydonlar, bog‘lar va o‘rmonlar dezinfeksiya qilingan. Dezinfeksiyaning ikkinchi bosqichi may-iyun oylariga mo‘ljallangan. Shu bilan birga, mutaxassislar aholiga himoyalanish uchun kana ensefalitiga qarshi emlanishni maslahat bermoqda.
“Shaharda emlashni yashash joyidagi shahar poliklinikalarida shifokor bilan maslahatlashganidan keyin bepul olish mumkin. Kurs 7 oylik interval bilan 2 ta emlashdan iborat. Emlashlar yil davomida, shu jumladan, epidemiya mavsumida ham amalga oshirilishi mumkin. Birinchi va ikkinchi emlashlar orasidagi eng maqbul interval 5-7 oy. Epidemiologik mavsumda kana ensefalit o‘chog‘iga tashrif buyurish ikkinchi emlashdan keyin 2 haftadan kechiktirmay ruxsat etiladi”, — deydi davlat sanitariya bosh vrachi Qosim Alpisboyo‘g‘li.
Kana chaqishidan qochish uchun oddiy xavfsizlik qoidalarini eslab qolib, ularga rioya qilish kerak. Tabiatga chiqqanda yopiq kiyim kiyish kerak, ust-boshni tekshirish zarur.
Agar kana allaqachon terida bo‘lsa, unda uni darhol olib tashlamaslik kerak. Avvalo shifokor bilan bog‘lanish zarur. Agar buning iloji bo‘lmasa, kana chaqqan joyga bir tomchi istalgan turdagi yog‘ni tomizish kerak. Bu kana nishi terida qolmasligiga yordam beradi. Mazkur protseduradan so‘ng kana ensefalitiga tekshirish uchun kasalxonaga borish kerak.
Izoh (0)