Qozog‘iston prezidenti Qosim-Jo‘mart To‘qayevga Xalqaro futbol federatsiyasi (FIFA) prezidenti Janni Infantino futbolka va to‘p sovg‘a qildi. Bu haqda Oqo‘rdaga tayanib, “Daryo”ning Qozog‘istondagi muxbiri xabar berdi.
Tomonlar mamlakat futboli salohiyatini oshirish va yoshlar sportini rivojlantirish masalalarini muhokama qilgan.
“Sizning tashrifingiz Qozog‘iston futbolini rivojlantirish nuqtai nazaridan juda muhim, deb hisoblayman. Dunyodagi eng ommabop va tomoshabop sport turi bo‘lgan futbolni rivojlantirish yo‘lida ko‘p ishlar qilayotganingizni bilaman.
Sa’y-harakatlaringizni qadrlaymiz va FIFA prezidenti sifatida sizni qo‘llab-quvvatlaymiz. Siz bilan yaxshi hamkorlikni davom ettirish niyatidamiz”, — degan Qozog‘iston rahbari.
O‘z navbatida, Janni Infantino FIFA o‘zining muvaffaqiyatli tajribasi bilan o‘rtoqlashishga va Qozog‘iston futboli rivojiga ko‘maklashishga tayyorligini aytgan.
“Qozog‘istonga birinchi tashrifim emas, ammo FIFA prezidenti sifatida birinchisi hisoblanadi. Shuning uchun siz bilan uchrashish men uchun katta sharafdir. Bu go‘zal mamlakatning barcha aholisi kabi siz ham futbolni yaxshi ko‘rishingizni bilaman. Birgalikda ajoyib ishlarni qila olamiz.
Qozog‘iston nafaqat mintaqaviy miqyosda, balki jahon miqyosida juda muhim davlatga aylandi. FIFA uchun bu ajoyib hamkor. Birgalikda ishlashimiz kerak, chunki futbol bu mamlakatda jamiyat integratsiyasi, shuningdek, boshqa mamlakatlardan kelgan odamlarni birlashtirish uchun katta imkoniyatlar yaratadi”, — dedi Janni Infantino.
Uchrashuv so‘ngida Infantino Qozog‘iston yetakchisiga 10-raqamli futbolka va to‘p sovg‘a qilgan. Prezident matbuot xizmati bu raqam Pele, Maradona, Zidan va boshqa afsonaviy futbolchilar shu raqamda o‘ynagani uchun tanlanganini aytgan.
Talgat Sotiboldi, Ostona
Izoh (0)