Qashqadaryo viloyatining Dehqonobod tumanidagi qishloqda aholining “Ochiq budjet” orqali qo‘lga kiritgan mablag‘i evaziga taʼmirlanayotgan yo‘l talabga javob bermasligi, taʼmir qo‘l uchida qilinayotgani xabar berildi.
“Yo‘lga juda yupqa va o‘ta sifatsiz yangi asfalt yotqizilmoqda. Bu ishlarning sifatli bajarilishini nazoratga oladigan tashkilot bormi? Yoki davlat pullari shunaqa qilib havoga sovurilib ketaveradimi? Mahallamiz hududida telefon aloqasi va internet qamrovi yo‘qligiga qaramasdan, xalqimiz faol bo‘lib, juda katta mashaqqatlar bilan Open budget axborot portalining ‘Tashabbusli budjet’ loyihasida g‘olib bo‘lgandik”, — deydi bu haqda sobiq deputat Kusherbayevga murojaat qilgan aholi vakillari.
Taʼkidlanishicha, “Kaltaminor” MFY Sho‘rguzar qishlog‘ida taʼmirlanayotgan yo‘l "Sardor kapital qurilish invest” MCHJ tomonidan amalga oshirilmoqda.
Bunga munosabat bildirgan Dehqonobod tumani hokimligi axborot xizmati holat uch kun avval bartaraf etilganini bildirdi.
“Mazkur kamchilik aholi tomonidan aniqlanib, masʼullarga maʼlum qilingach, o‘sha kunning o‘zida, aniqrog‘i, bundan uch kun avval bartaraf etilgan. Sho‘rguzar qishlog‘ida 2 km 270 metr yo‘lga asfalt qoplamasi yotqizish ko‘zda tutilgan. Hozirda qurilish ishlari davom etmoqda. Ushbu sifatsiz qilingan ish o‘sha joyning o‘zida jamoatchilik nazorati va buyurtmachi tashkilot mas’uli tomonidan bartaraf etilgan. Qolaversa, shu voqea sabab hududda tuman hokimligi, MFY masʼullari va aholidan yo‘l bo‘yicha jamoatchilik nazorati tuzilgan”, — deyiladi hokimlik munosabatida.
Izoh (0)