Toshkentdagi bog‘chada 4 nafar qizchaga tegajog‘lik qilingani, voqea “qahramoni” bog‘cha direktorining 15 yoshli o‘g‘li ekani aytilmoqda

“Gazeta.uz” saytida Toshkent shahrining Chilonzor tumanidagi bolalar bog‘chasida 4 nafar qizchaga tegajog‘lik qilingani, bunda bog‘cha direktorining 15 yoshli o‘g‘li ayblanayotgani aytilgan maqola eʼlon qilindi.

Taʼkidlanishicha, bunday voqea Chilonzor tumanidagi 230-sonli bolalar bog‘chasida sodir bo‘lgan.

Nashrga bir nechta ota-onalar murojaat qilib, ularning farzandlariga Toshkent shahri Chilonzor tumanidagi 230-sonli maktabgacha taʼlim tashkiloti direktorining 11- yoki 9-sinfida o‘quvchi o‘g‘li tegajog‘lik qilganini aytgan. Ularning so‘zlariga ko‘ra, voqea 2-may kuni tushdan keyin 6 yoshli bolalar guruhi uxlashga kirganida sodir bo‘lgan va gumonlanuvchi bola 4 nafar qizchaga tegajog‘lik qilgan.

Muxbir bilan suhbatda direktor bu tuhmat ekanini taʼkidlagan bo‘lsa, boshqa bolalarning ota-onalari esa ushbu holat rostdan ham bo‘lganini, ularning farzandlari so‘zlab berishganini aytgan.

Jabrlanuvchi qizchaning buvisi qizlarga direktorning Hasan-Husan o‘g‘illaridan biri tegajog‘lik qilgan bo‘lishi mumkinligini aytgan.

“Direktorning ikki o‘g‘li Hasan-Husan har doim bog‘chada yuradi. Qizchalar xonaga Hasan kirgan deb aytishyapti. Suhbatda kirganini aytib qo‘ymasin deb, kirmagan bolani Husanni tergovga kirgizishyapti. O‘g‘il bolalarning dadasi ham o‘g‘limni chaqirib, ota-onalardan uzr so‘raymiz, bizdan o‘tdi, degan gaplarni aytgan. O‘g‘lim shularni diktofoniga yozib olgan”, — deydi u. 

To‘rt nafar qizchaning bari 15 yoshli bola “ularning ishtoni va ich kiyimini yechib, nomaqbul harakatlarni” amalga oshirganini so‘zlab bergan.

“Bog‘cha hamshirasining qizi Hasan akamni ko‘rgandim, kelib shu ishni qildilar, ishtonini yechdilar, deb gapirib bergandi bizga. Onasi va tarbiyachisi kelganidan so‘ng qanday ko‘rasan, sen yo‘q eding-ku, tashqaringda yurganding-ku, deb po‘pisa qilganidan keyin qiz men yolg‘on gapirdim, deb qoldi. Uni ham psixologga chaqirishgandi, lekin onasi olib kelmadi, hozir bog‘chaga ham kelmayapti. Direktor bilan hamshiraning tili bir. Lekin Allohdan qo‘rqmayapti ular”, — deydi jabrlanuvchining buvisi.

Suhbatdoshning aytishicha, ularning farzandi bolaga qarshilik ko‘rsatgan, biroq u kuch ishlatib, “ko‘zingni yumib ol” deya, o‘z ishida davom etgan. “Yechmang desam, kuchim yetmadi. Ovozi ham yo‘g‘on edi, qo‘rqma, ko‘zingni yumib yot, hech kim ko‘rmayapti, hamma uxlayapti deb aytdi”, dedi qizcha. Uning buvisi esa “Bola shunday gaplarni o‘ylab topa oladimi?” — deya savol bilan yuzlangan.

Voqea sodir bo‘lgan vaqtda Lyudmila ismli bog‘cha opasi ish joyida bo‘lmagan. Uning o‘zi bunga “bu yerda faqat tushlik vaqtigacha ishlashini” sabab qilib ko‘rsatdi. Qolaversa, uning fikricha, “bolachalar aldashni, ayniqsa, bunday gaplarni to‘qib chiqarishni bilmaydi”. Uning yordamchisi esa bolalarni uxlatishga kirgizib, o‘zi ikkinchi tushlik olib kelish uchun chiqib ketgan bo‘lgan.

Mazkur holat yuzasidan to‘plangan material bo‘yicha Chilonzor tumani IIO FMB tergov bo‘limi tomonidan tekshiruv o‘tkazilmoqda. Telefon orqali suhbat davomida tergovchi maʼlumot bera olmasligini, buning uchun poytaxt IIBBdan ruxsat olish zarurligini taʼkidladi.

Voqea doirasida tekshiruv boshlangach, bolalar ekspertizaga olib borilgan. Biroq, ota-onalarning so‘zlariga ko‘ra, ularni faqat og‘zaki so‘roq qilishgan, xolos. Psixolog bilan suhbat esa ota-onalar va ularsiz amalga oshirilgan. Suhbat yakunida esa psixolog chiqib, “bola qizlarga tegingan, xulosam shu”, — deb tasdiqlagan.

“Bu — tuhmat”. Bog‘cha direktorining fikri

Ism-familiyasini ko‘rsatmaslikni iltimos qilgan 230-sonli MTT direktori o‘g‘li MMA bilan shug‘ullanishi, hozirda 9-sinfda o‘qiyotgani va 15 yoshdaligini aytdi. Qolaversa, u yuqoridagi ayblovni rad etib, “buning barchasi tuhmat ekanini” taʼkidlagan. Biroq o‘g‘lining tarbiyalanuvchilar uxlayotgan xonaga kirganini rad etmadi. Uning so‘zlariga ko‘ra, o‘g‘li xonaga 3:30 larda kirib, 3:40 larda chiqib ketgan, yaʼni ichkarida 10 daqiqa bo‘lgan.

“O‘g‘limning aqli-hushi joyida. Maqtanish emas, bolamni besh mahal namozga solganman. Dodasi bomdodni jamoat bilan o‘qish kerak deydi, birga namoz o‘qishadi… Bu — o‘sayotgan bolani sindirish!”, — degan bog‘cha direktori.

Bog‘cha direktori jurnalistdan ishga bunchalik chuqur yondashmaslikni, bu “eʼtibor berib, yoritishga arzimaydigan mavzu” ekanini aytgan. Va umuman yoritmaslikni so‘ragan. Direktor, shuningdek, tibbiy ekspertizaning javobi “toza” chiqqanini, organ xodimlari hozircha bu haqda ota-onalarni xabardor qilmaganini aytib, organ xodimlari indamay turish va oradan 3−4 kun o‘tib, hammasi unutilib ketishini aytganini bildirgan.

Guvohlar nima deydi?

Mazkur holatni o‘z ko‘zi bilan ko‘rgan bir qizcha kechki payt voqeani onasiga so‘zlab bergan. Uning aytishicha, qizchalarga Hasan tegingan. Onasi farzandi Hasan va Husanlarni yaxshi ajrata olishi va ular bog‘chaga kelib turganini qayd etgan.

“Dilya opam bulochka olib kelgani chiqib ketgan paytda Hasan aka qizlarning ishtoni va ichki kiyimini yechib, mana shunaqa qildi, dedi. Senga tegmadimi desam, yonimgacha keldi, ismimni so‘radi, aytdim, dedi. Menga tegmadi, lekin boshqa qizlarni shunaqa qildi, dedi. O‘sha kuni bu voqealarni kechasi bildim”, — degan voqea guvohi bo‘lgan qizchaning onasi.

Poytaxt IIBBning “Gazeta.uz”ga maʼlum qilishicha, mazkur holat nazoratga olingan va tekshiruv yakuni bo‘yicha qonuniy qaror qabul qilinadi. Bosh prokuratura ham mazkur voqea yuzasidan munosabat bildirib, holat nazoratga olinganini, natijalari haqida qo‘shimcha axborot berilishini maʼlum qildi.