Деҳқонободдаги маҳаллада йўл таъмири сифатсиз, асфальт талабга жавоб бермаслиги хабар қилинди. Ҳокимлик бу камчилик 3 кун аввал тузатилганини билдирди

Қашқадарё вилоятининг Деҳқонобод туманидаги қишлоқда аҳолининг “Очиқ бюджет” орқали қўлга киритган маблағи эвазига таъмирланаётган йўл талабга жавоб бермаслиги, таъмир қўл учида қилинаётгани хабар берилди.

“Йўлга жуда юпқа ва ўта сифатсиз янги асфальт ётқизилмоқда. Бу ишларнинг сифатли бажарилишини назоратга оладиган ташкилот борми? Ёки давлат пуллари шунақа қилиб ҳавога совурилиб кетаверадими? Маҳалламиз ҳудудида телефон алоқаси ва интернет қамрови йўқлигига қарамасдан, халқимиз фаол бўлиб, жуда катта машаққатлар билан Open budget ахборот порталининг ‘Ташаббусли бюджет’ лойиҳасида ғолиб бўлгандик”, — дейди бу ҳақда собиқ депутат Кушербаевга мурожаат қилган аҳоли вакиллари.

Таъкидланишича, “Калтаминор” МФЙ Шўргузар қишлоғида таъмирланаётган йўл "Сардор капитал қурилиш инвест” МЧЖ томонидан амалга оширилмоқда.

Бунга муносабат билдирган Деҳқонобод тумани ҳокимлиги ахборот хизмати ҳолат уч кун аввал бартараф этилганини билдирди.

“Мазкур камчилик аҳоли томонидан аниқланиб, масъулларга маълум қилингач, ўша куннинг ўзида, аниқроғи, бундан уч кун аввал бартараф этилган. Шўргузар қишлоғида 2 км 270 метр йўлга асфальт қопламаси ётқизиш кўзда тутилган. Ҳозирда қурилиш ишлари давом этмоқда. Ушбу сифатсиз қилинган иш ўша жойнинг ўзида жамоатчилик назорати ва буюртмачи ташкилот масъули томонидан бартараф этилган. Қолаверса, шу воқеа сабаб ҳудудда туман ҳокимлиги, МФЙ масъуллари ва аҳолидан йўл бўйича жамоатчилик назорати тузилган”, — дейилади ҳокимлик муносабатида.