AQSHda chet ellik sayohatchilar uchun koronavirusga qarshi emlanish talabi 11-mayda tugaydi. Davlat xizmatchilari, o‘qituvchilar, tibbiyot xodimlari va federal pudratchilar uchun koronavirusga qarshi majburiy emlash talabi ham bekor qilinadi. Bu haqda Oq uy matbuot xizmati xabar berdi.
“Maʼmuriyat federal xodimlar, federal pudratchilar va chet eldan kelgan aviayo‘lovchilar uchun koronavirusga qarshi emlanish talabini 11-may kuni tugatadi. Shu kundan boshlab sog‘liqni saqlash sohasidagi favqulodda vaziyat ham tugaydi”, — deyiladi bayonotda.
2021-yilda Bayden administratsiyasi odamlar xavfsizligi va salomatligini ta’minlash, ish joylari samaradorligini oshirish, mamlakat iqtisodiyotining muhim sektorlarini himoyalash maqsadida koronavirusga qarshi vaksinatsiya talablarini e’lon qilgandi. 2021-yil yanvaridan boshlab AQSHda COVID-19 bilan bog‘liq o‘lim holatlari 95 foizga, shifoxonaga yotqizilayotgan fuqarolar esa qariyb 91 foizga kamaygan.
“Administratsiyamizning emlash bo‘yicha talablari muhim ishchi kuchlarini, jumladan, sog‘liqni saqlash va taʼlim sohasidagi xodimlarni xavfsiz saqlashga, o‘zlarini va ular xizmat qilayotgan jamoalarni himoya qilishga hamda xizmatlarni uzluksiz yetkazib berish imkoniyatini mustahkamlashga yordam berdi”, — deya ta’kidlanadi bayonotda.
9-aprel kuni Miami Health System universiteti va Mayami universiteti qoshidagi Miller tibbiyot maktabi AQSHda miyasi shikastlangan ikki bola tug‘ilganini, bunga ularning onalari homiladorlik paytida koronavirus yuqtirgani sabab bo‘lganini ma’lum qildi. Ikkalasida ham sudirgi, mikrosefaliya va rivojlanishdan ortda qolish bor, chaqaloqlarning COVID-19 uchun testi manfiy bo‘lsa-da, ularda antitanachalar soni juda yuqori ekani aniqlangan. Bir necha kundan keyin AQSH prezidenti Jo Bayden mamlakatda COVID-19 pandemiyasi bilan bog‘liq favqulodda holat tartibini bekor qiluvchi qonunni imzolagan.
Izoh (0)