AQSH prezidenti Jo Bayden mamlakatda COVID-19 pandemiyasi bilan bog‘liq favqulodda holat tartibini bekor qiluvchi qonunni imzoladi. Bu haqda Oq uy saytida chop etilgan bayonotda aytiladi.
Mamlakatda 2020-yil 1-martdan boshlab favqulodda holat joriy qilingan va bir necha bor uzaytirilgan. 31-yanvar kuni Oq uy boshqaruv va budjet bo‘limi matbuot xizmati prezident ma’muriyati rejimni 11-maydan tugatish tarafdori ekanini ma’lum qilgandi.
2023-yil 10-aprel holatiga ko‘ra, AQSHda bir hafta ichida 120 000 dan ortiq kishida koronavirus aniqlangan, kasallikdan 1 773 o‘lim holati qayd etilgan. Bu haqda Amerika Kasalliklarni nazorat qilish markazi xabarida aytiladi.
9-aprel kuni Miami Health System universiteti va Mayami universiteti qoshidagi Miller tibbiyot maktabi AQSHda miyasi shikastlangan ikki bola tug‘ilganini, bunga ularning onalari homiladorlik paytida koronavirus yuqtirgani sabab bo‘lganini ma’lum qildi. Ikkalasida ham sudirgi, mikrosefaliya va rivojlanishdan ortda qolish bor, chaqaloqlarning COVID-19 uchun testi manfiy bo‘lsa-da, ularda antitanachalar soni juda yuqori ekani aniqlangan.
Eslatib o‘tamiz, 2021-yil 23-fevralda AQSHda koronavirus infeksiyasidan vafot etganlar soni 500 ming kishidan oshgan edi. Shu munosabat bilan Bayden motam belgisi sifatida butun mamlakat bo‘ylab bayroqlarni besh kun davomida yarim tushirilgan holatda qoldirishni buyurgan.
Izoh (0)