АҚШда чет эллик саёҳатчилар учун коронавирусга қарши эмланиш талаби 11 майда тугайди. Давлат хизматчилари, ўқитувчилар, тиббиёт ходимлари ва федерал пудратчилар учун коронавирусга қарши мажбурий эмлаш талаби ҳам бекор қилинади. Бу ҳақда Оқ уй матбуот хизмати хабар берди.
“Маъмурият федерал ходимлар, федерал пудратчилар ва чет элдан келган авиайўловчилар учун коронавирусга қарши эмланиш талабини 11 май куни тугатади. Шу кундан бошлаб соғлиқни сақлаш соҳасидаги фавқулодда вазият ҳам тугайди”, — дейилади баёнотда.
2021 йилда Байден администрацияси одамлар хавфсизлиги ва саломатлигини таъминлаш, иш жойлари самарадорлигини ошириш, мамлакат иқтисодиётининг муҳим секторларини ҳимоялаш мақсадида коронавирусга қарши вакцинация талабларини эълон қилганди. 2021 йил январидан бошлаб АҚШда COVID-19 билан боғлиқ ўлим ҳолатлари 95 фоизга, шифохонага ётқизилаётган фуқаролар эса қарийб 91 фоизга камайган.
“Администрациямизнинг эмлаш бўйича талаблари муҳим ишчи кучларини, жумладан, соғлиқни сақлаш ва таълим соҳасидаги ходимларни хавфсиз сақлашга, ўзларини ва улар хизмат қилаётган жамоаларни ҳимоя қилишга ҳамда хизматларни узлуксиз етказиб бериш имкониятини мустаҳкамлашга ёрдам берди”, — дея таъкидланади баёнотда.
9 апрель куни Miami Health System университети ва Майами университети қошидаги Miller тиббиёт мактаби АҚШда мияси шикастланган икки бола туғилганини, бунга уларнинг оналари ҳомиладорлик пайтида коронавирус юқтиргани сабаб бўлганини маълум қилди. Иккаласида ҳам судирги, микросефалия ва ривожланишдан ортда қолиш бор, чақалоқларнинг COVID-19 учун тести манфий бўлса-да, уларда антитаначалар сони жуда юқори экани аниқланган. Бир неча кундан кейин АҚШ президенти Жо Байден мамлакатда COVID-19 пандемияси билан боғлиқ фавқулодда ҳолат тартибини бекор қилувчи қонунни имзолаган.
Изоҳ (0)