Rossiya Tashqi ishlar vaziri rasmiy vakili Mariya Zaxarova O‘zbekistonda Konstitutsiya islohoti bo‘yicha umumxalq referendumi o‘tkazilgani yuzasidan bayonot berdi.
O‘zbekistonda 30-aprel kuni “O‘zbekiston Respublikasining Konstitutsiyasi to‘g‘risida”gi Konstitutsiyaviy qonunning qabul qilishi bo‘yicha referendum o‘tkazildi.
MDH, SHHT, MDHning parlamentlararo assambleyasi, YXHT Demokratik institutlar va inson huquqlari bo‘yicha byurosi va boshqa birlashmalarning monitoring missiyasi tarkibida faol ishlagan rossiyalik kuzatuvchilarning baholashicha, ovoz berish jarayonlari ochiq xarakterga ega bo‘lgan, tinch muhitda o‘tkazilgan. “Respublika hukumati referendum xalqaro normalar va umume’tirof etilgan demokratik tamoyillarga to‘la mos holda o‘tkazish uchun barcha shart-sharoit yaratdi”, — deya ta’kidlanadi bayonotda.
Qayd etilishicha, referendum natijalari O‘zbekiston jamiyati tomonidan prezident Shavkat Mirziyoyevning siyosiy yo‘nalishi yuksak darajada qo‘llab-quvvatlanayotganini yaqqol ko‘rsatgan.
“O‘zbekistonda konstitutsiyaviy referendumning muvaffaqiyatli o‘tkazilishini mamlakat siyosiy taraqqiyotidagi muhim bosqich sifatida olqishlaymiz. Biz Rossiya—O‘zbekiston ko‘p qirrali strategik sheriklik va ittifoqchilik munosabatlarini yanada mustahkamlash borasidagi prinsipial niyatimizni yana bir bor tasdiqlaymiz”, — deyiladi bayonotda.
Referendumda Konstitutsiya to‘g‘risidagi Konstitutsiyaviy qonunni qabul qilasizmi degan savolga 19 million 722 ming 809 nafar fuqarodan 15 million 40 ming 55 nafari (90,21 foizi) yoqlab, 1,5 million nafari qarshi ovoz berdi. “O‘zbekiston Respublikasining referendumi to‘g‘risida”gi qonunning 38-moddasiga ko‘ra, ovoz berishda ishtirok etgan fuqarolarning yarmidan ko‘prog‘i yoqlab ovoz bergan bo‘lsa, qaror referendumda qabul qilingan deb topiladi.
Izoh (0)