Kiyev qarshi hujumga oid rejalarini AQSH bilan bo‘lishmayapti — Politico

Ukraina hukumati bahorgi qarshi hujumga oid maxfiy ma’lumotlar yana tarqalib ketib, jang maydonida Kiyev pozitsiyasini xavf ostiga qo‘yishi mumkinligi sabab ularni g‘arbdagi ittifoqchilaridan sir tutmoqda. Bu haqda Politico nashri yevropalik ikki amaldorga tayanib, xabar berdi.

AQSH Milliy gvardiyasi Harbiy-havo kuchlarining xizmatchisi Jek Teysheyra Ukrainaning jangovar harakatlariga oid batafsil, jumladan, ukrain qo‘shinlarining pozitsiyasi va qurol-yaroq zaxirasi, shuningdek, yo‘qotishlariga oid Amerika razvedkasining maxfiy ma’lumotlarini tarqatganlikda gumonlanmoqda. Amerika hukumati bir necha kun davomida Kiyev va Yevropadagi ittifoqchilarini bunday holatlar kelajakda qaytarilishining oldini olish bo‘yicha kerakli choralarni ko‘rganiga ishontirgan.

Shunga qaramay, Ukraina jangovar harakatlarini rejalashtirishga bog‘liq keng ma’lumotlar taqdim etilishining oldini olishga intilmoqda. Manbalarga ko‘ra, Kiyev 2022-yildan beri o‘ziga harbiy yordam ko‘rsatayotgan AQSH va Yevropa davlatlari bilan faqat ayrim asosiy razvedka ma’lumotlarini bo‘lishmayapti.

Gazeta suhbatlashgan ukrainalik deputatning so‘zlariga ko‘ra, yuqori martabali amaldorlar qarshi hujumga tayyorgarlikka oid ma’lumotlarni hatto ukrain siyosatchilariga ham aytmagan, “mamlakatda mazkur rejadan faqat bir necha kishi xabardor”.

AQSH Mudofaa vazirligi vakillari Pentagon biror-bir o‘zgarishni sezmaganini, Vashington va Kiyev oldingi darajada ma’lumotlar almashayotganini ma’lum qilgan. Jo Bayden administratsiyasi esa Ukraina oldin ham o‘z rejalarini to‘liq oshkor etmaganini qayd etdi.

AQSH Milliy xavfsizlik kengashi vakili Jon Kirbi jurnalistlar bilan suhbatda Kiyev o‘z rejalari haqida Vashingtonga ma’lumot berishga majburligini aytgan. Uning so‘zlariga ko‘ra, AQSH Ukrainaga real vaqt rejimida razvedka ma’lumotlarini berishni davom etmoqda.

Rossiyaning Ukrainaga so‘nggi hujumlari va oqibatlari

1-mayga o‘tar kechasi Rossiya qo‘shinlari Ukrainaga navbatdagi raketa hujumini uyushtirdi. Ukraina qurolli kuchlari qo‘mondonligi 18 ta raketadan 15 tasini urib tushirganini ma’lum qildi. Dnepropetrovsk viloyatidagi Pavlograd shahrining o‘qqa tutilishi oqibatida ikki kishi halok bo‘ldi, 40 kishi yaralandi. O‘nlab uylar vayron bo‘lgan.

28-aprelga o‘tar kechasi Rossiya armiyasi Dnepropetrovsk, Cherkas va Kiyev viloyatlaridagi shaharlarga raketa hujumi uyushtirdi. Ukraina qurolli kuchlari ma’lumotlariga ko‘ra, 23 ta raketadan 21 tasi urib tushirilgan. Uman shahridagi ko‘p qavatli turar joy binosiga raketa tushishi oqibatida 23 kishi, jumladan, olti bola halok bo‘lgan.