Qirg‘iziston prezidenti Sadir Japarov 1-may kuni bo‘lib o‘tgan telefon orqali muloqotda Shavkat Mirziyoyevni Konstitutsiya bo‘yicha referendumning muvaffaqiyatli natijalari va ushbu tadbir xalqaro standartlarga muvofiq tashkil etilgani bilan tabrikladi.
Prezident matbuot xizmatining xabar qilishicha, suhbat davomida davlat rahbarlari O‘zbekiston bilan Qirg‘iziston o‘rtasidagi ko‘p qirrali hamkorlik va keng qamrovli strategik sheriklik munosabatlari jadal rivojlanib borayotganini qayd etdi.
Sanoat kooperatsiyasi bo‘yicha yirik loyihalarni ilgari surishda amaliy natijalarga erishilayotgani qayd etilib, tovar ayirboshlash hajmini oshirish muhimligi ta’kidlandi.
Qirg‘izistonning O‘sh shahrida Bobur nomidagi o‘zbek akademik teatri ta’mirlanib, foydalanishga topshirilgandi. Xabarda ta’kidlanishicha, ushbu teatrning yangilangan binosi ochilgani va Qo‘qon shahrida talabalar spartakiadasi o‘tkazilgani qardosh xalqlarni yaqinlashtirishda muhim ahamiyatga ega.
Suhbat davomida davlat rahbarlari ikki mamlakat oqsoqollari va yoshlari ishtirokidagi Avlodlar muloqotiga puxta tayyorgarlik ko‘rish bo‘yicha topshiriq berdi.
Mintaqaviy hamkorlik masalalari, shu jumladan, joriy yilning iyun oyida Qirg‘izistonda o‘tkaziladigan ko‘p tomonlama sammitga tayyorgarlik yuzasidan ham fikr almashilgan.
Bundan avval Qozog‘iston prezidenti Qosim-Jo‘mart To‘qayev referendum muvaffaqiyatli o‘tkazilgani bilan Shavkat Mirziyoyevni tabriklagandi. Referendumning dastlabki natijalariga ko‘ra, Konstitutsiya to‘g‘risidagi Konstitutsiyaviy qonunni qabul qilasizmi degan savolga 19 million 722 ming 809 nafar fuqarodan 15 million 40 ming 55 nafari (90,21 foizi) yoqlab ovoz bergan.
Izoh (0)