Қирғизистон президенти Садир Жапаров 1 май куни бўлиб ўтган телефон орқали мулоқотда Шавкат Мирзиёевни Конституция бўйича референдумнинг муваффақиятли натижалари ва ушбу тадбир халқаро стандартларга мувофиқ ташкил этилгани билан табриклади.
Президент матбуот хизматининг хабар қилишича, суҳбат давомида давлат раҳбарлари Ўзбекистон билан Қирғизистон ўртасидаги кўп қиррали ҳамкорлик ва кенг қамровли стратегик шериклик муносабатлари жадал ривожланиб бораётганини қайд этди.
Саноат кооперацияси бўйича йирик лойиҳаларни илгари суришда амалий натижаларга эришилаётгани қайд этилиб, товар айирбошлаш ҳажмини ошириш муҳимлиги таъкидланди.
Қирғизистоннинг Ўш шаҳрида Бобур номидаги ўзбек академик театри таъмирланиб, фойдаланишга топширилганди. Хабарда таъкидланишича, ушбу театрнинг янгиланган биноси очилгани ва Қўқон шаҳрида талабалар спартакиадаси ўтказилгани қардош халқларни яқинлаштиришда муҳим аҳамиятга эга.
Суҳбат давомида давлат раҳбарлари икки мамлакат оқсоқоллари ва ёшлари иштирокидаги Авлодлар мулоқотига пухта тайёргарлик кўриш бўйича топшириқ берди.
Минтақавий ҳамкорлик масалалари, шу жумладан, жорий йилнинг июнь ойида Қирғизистонда ўтказиладиган кўп томонлама саммитга тайёргарлик юзасидан ҳам фикр алмашилган.
Бундан аввал Қозоғистон президенти Қосим-Жўмарт Тўқаев референдум муваффақиятли ўтказилгани билан Шавкат Мирзиёевни табриклаганди. Референдумнинг дастлабки натижаларига кўра, Конституция тўғрисидаги Конституциявий қонунни қабул қиласизми деган саволга 19 миллион 722 минг 809 нафар фуқародан 15 миллион 40 минг 55 нафари (90,21 фоизи) ёқлаб овоз берган.
Изоҳ (0)