O‘zbekistonda o‘tkazilgan referendumning dastlabki natijalari e’lon qilindi

Markaziy saylov komissiyasi raisi Zayniddin Nizomxo‘jayev O‘zbekistonda 30-aprel kuni o‘tkazilgan referendumning dastlabki natijalarini e’lon qildi.

Unga ko‘ra, “Referendumda Konstitutsiya to‘g‘risidagi Konstitutsiyaviy qonunni qabul qilasizmi degan savolga 19 million 722 ming 809 nafar fuqarodan 15 million 40 ming 55 nafari (90,21 foizi) yoqlab, 1,5 million nafari qarshi ovoz berdi. Saylov byulletenlarining 0,49 foizi haqiqiy emas deb topildi.

 “O‘zbekiston Respublikasining referendumi to‘g‘risida”gi qonunning 38-moddasiga ko‘ra, ovoz berishda ishtirok etgan fuqarolarning yarmidan ko‘prog‘i yoqlab ovoz bergan bo‘lsa, qaror referendumda qabul qilingan deb topiladi.

“Shu munosabat bilan, dastlabki ma’lumotlarga tayanib, “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi Konstitutsiyaviy qonuni O‘zbekiston Respublikasi xalqi tomonidan referendumda qabul qilingan deyishga barcha asoslar bor! Albatta, referendumning yakuniy natijalari Markaziy saylov komissiyasining tegishli qarori qabul qilinib, rasmiy e’lon qilingandan so‘ng kuchga kiradi” — dedi Zayniddin Nizomxo‘jayev.

Uning qayd etishicha, referendum xalqaro normalar va standartlarga, O‘zbekiston referendum qonunchiligiga, unda belgilangan ochiqlik va oshkoralik kabi umume’tirof etilgan demokratik prinsiplarga to‘la mos holda o‘tkazildi.

Markaziy saylov komissiyasi raisi referendumni o‘tkazish jarayonlarida uning natijalariga ta’sir qilmaydigan ayrim kamchiliklar kuzatilganini ham qayd etib o‘tdi.

Uning bildirishicha, 8-Sirdaryo viloyati referendum okrugining 226-son, 10-Toshkent viloyati referendum okrugining 651-son, 14-Toshkent shahar referendum okrugining 772-son referendum uchastkalarida atroflicha ko‘rib chiqilishi lozim bo‘lgan holatlar aniqlandi. Sirdaryo va Toshkent viloyatlaridagi holatlar Markaziy saylov komissiyasining monitoringi natijasida aniqlangan bo‘lsa, Toshkent shahridagi holat ommaviy axborot vositalari orqali aniqlangan. 

Zayniddin Nizomxo‘jayev ularning har biri yuzasidan Markaziy saylov komissiyasi va okrug komissiyalari tomonidan mutasaddi idoralar bilan birgalikda o‘rganishlar olib borilayotganini ma’lum qildi.

“Umuman olganda, respublika bo‘yicha 10 758 ta uchastka faoliyat olib borganini hisobga oladigan bo‘lsak, referendum jarayonlarida kamchiliklar kuzatilgan uchastkalar 0,1 foizni ham tashkil etmaydi”, — deya qo‘shimcha qildi u.