Qozog‘iston prezidenti Qosim-Jo‘mart To‘qayev O‘zbekiston Konstitusiyasiga o‘zgartirishlar kiritish bo‘yicha referendum muvaffaqiyatli o‘tkazilgani bilan Shavkat Mirziyoyevni tabrikladi.
Prezident matbuot xizmatining xabar qilishicha, davlat rahbarlari 1-may kuni telefon orqali muloqot qildi. Suhbat davomida oliy darajadagi kelishuvlarni amalga oshirish masalalari va yirik kooperatsiya loyihalarining borishi muhokama qilindi.
Suhbat avvalida Qozog‘iston prezidenti 30-aprel kuni O‘zbekiston Konstitutsiyasiga o‘zgartirishlar kiritish bo‘yicha referendum muvaffaqiyatli o‘tkazilgani bilan qutladi. Referendumning dastlabki natijalariga ko‘ra, Konstitutsiya to‘g‘risidagi Konstitutsiyaviy qonunni qabul qilasizmi degan savolga 19 million 722 ming 809 nafar fuqarodan 15 million 40 ming 55 nafari (90,21 foizi) yoqlab ovoz bergandi.
Shavkat Mirziyoyev o‘z navbatida, Qozog‘iston yetakchisi va qardosh xalqini davlat bayrami — Birdamlik kuni bilan tabrikladi.
Muloqot chog‘ida davlat rahbarlarining qarorlarini o‘z navbatida amalga oshirish, eng avvalo, ustuvor tarmoqlardagi kooperatsiya dasturlarini tayyorlash va bajarish masalalariga ham alohida e’tibor qaratilgan.
Shu munosabat bilan hukumatlarga shu hafta Toshkent shahrida o‘tadigan Hukumatlararo komissiya yig‘ilishi davomida qo‘shma loyihalarni jadallashtirish yuzasidan chora-tadbirlar ko‘rish topshirildi.
O‘zbekiston va Qozog‘iston prezidentlari bo‘lajak tadbirlar rejasini ham ko‘rib chiqdi.
Izoh (0)