O‘zbekistonda 2023-yilning aprel oyida 0,8 foizlik inflyatsiya qayd etildi. Bu haqda Statistika agentligi xabar bermoqda.
Iste’mol narxlari yil boshidan beri 3,3 foizga oshgan. Yillik inflyatsiya pasayib 11 foizni tashkil qildi. 2022-yil may oyida ham xuddi shunday ko‘rsatkich qayd etilgan edi.
Aprel oyida Restoran va mehmonxona xizmatlari bo‘limi bo‘yicha narxlar 0,8 foizga oshgan. Oziq-ovqat mahsulotlari va spirtsiz ichimliklar bo‘limi bo‘yicha bu ko‘rsatkich 1,3 foizni, spirtli ichimliklar, tamaki mahsulotlari bo‘yicha esa 1 foizni tashkil qildi.
Yakunlangan oyda narxlar o‘sishi bo‘yicha oziq-ovqat mahsulotlari yetakchi bo‘ldi. Mazkur guruh uchun yillik narxlar o‘sishi 13,7 foiz bo‘lgan va bu so‘nggi uch yildagi eng yuqori ko‘rsatkich hisoblanadi.
O‘zbekiston bozorlarida yangi piyoz paydo bo‘lgan bo‘lsa ham, ushbu mahsulotning narxi o‘tgan yilning apreliga nisbatan 86,4 foizga qimmatligicha qolmoqda.
Aprel oyida bir qator sabzavotlar narxining pasayishi kuzatilgan bo‘lsa, banan (+39,6 foiz) va pomidor (+21,3 foiz) narxi oshgan.
2023-yilning aprelida o‘tgan oydagi kabi benzin va propan narxlarida pasayish qayd etildi. Benzin 3,7 foizga arzonlagan bo‘lsa, propan narxi 12,9 foizga tushgan.
Izoh (0)