O‘zbekistonda 27—28-aprel kunlari Ikkinchi Toshkent Xalqaro investitsiya forumi bo‘lib o‘tdi. TXIF-2023da dunyoning 70 mamlakatidan 2,5 mingdan oshiq ishtirokchi qatnashdi. 2022-yilgi forumga 50 mamlakatdan 1,5 ming nafar mehmon tashrif buyurgan edi.
Tadbir doirasida ekspertlarning 30 dan ortiq muhokama uchrashuvlari, jumladan, davra suhbatlari va investitsion muzokaralar o‘tkazildi.
Jumladan, “An’anaviy energiya: qarashlar va istiqbollar” davra suhbatida “O‘zbekneftgaz” boshqaruvi raisi Bahodir Sidiqov mamlakatga neft va gaz bo‘yicha investorlarni jalb qilish haqida gapirib o‘tdi.
Forumning “Bank va moliya: yangi imkoniyatlar” mavzusidagi davra suhbatida ekspertlar bank ishi doimiy ravishda rivojlanib borayotgan soha ekanligi, hozirda O‘zbekiston bozorida ko‘plab imkoniyatlar mavjudligini ta’kidladi.
Bundan tashqari, Xalqaro Islom savdo moliya korporatsiyasi bosh operatsion direktori Nazim Nordali “Daryo”ga Trade Connect Central Asia+ dasturi, O‘zbekistondagi investitsion holat, mamlakat haqidagi taassurotlari haqida batafsil so‘zlab berdi.
Tadbirda o‘zaro hamkorlik, xususan, O‘zbekiston korporatsiyasi va korxonalari o‘rtasida savdoni rivojlantirish yo‘nalishlari muhokama qilindi.
Trade Connect Central Asia + dasturi xususiy sektorning xalqaro savdo salohiyatini ochish va oshirish, shuningdek, Markaziy Osiyo mintaqasi va Ozarbayjonda Islom hamkorlik tashkilotiga (IHT) a’zo mamlakatlar o‘rtasidagi savdoni rivojlantirishga ko‘maklashishga qaratilgan. Trade Connect Central Asia+ dasturi kelgusi 5 yil ichida 600 million dollar miqdorida mablag‘ ajratishni rejalashtirmoqda.
Agar birinchi forum doirasida jami 7,8 mlrd dollarlik 105 ta hujjat imzolangan bo‘lsa, joriy yilda TXIF-2023 doirasida 164 ta kelishuv va shartnoma imzolandi, ularning umumiy qiymati 11 mlrd dollarga yetdi.
Ma’lum bo‘lishicha, erishilgan kelishuvlarni o‘z vaqtida va sifatli amalga oshirish maqsadida “yo‘l xaritasi” ishlab chiqildi. Unda har bir loyihaning ijrochilari va amalga oshirish muddatlari belgilab qo‘yildi.
Izoh (0)