Osiyoning eng boy bankiri, Hindistonning yirik banklaridan biri Kotak Mahindra Bank bosh direktori Uday Kotak AQSH dollarini keskin tanqid qildi. Bu haqda The Economic Times xabar berdi.
Kotakning fikricha, AQSH dollarining zaxira valyutasi maqomi unga global operatsiyalarni nazorat qilish imkoniyatini beradi, bu esa boshqa davlatlar unga qaram bo‘lib qolishi mumkin bo‘lgan vaziyatlarga olib keladi.
“Bizning barcha pullarimiz nostro (bu chet eldagi bank tomonidan milliy valyutada yuritiladigan hisob) hisoblarida va AQSHda kimdir uni yechib ololmaysiz, deb aytishi mumkin. Shu paytda siz ’tupikda’ bo‘lasiz”, — degan u.
Kotakning so‘zlariga ko‘ra, hozir butun dunyo “muqobil zaxira valyutasini astoydil izlamoqda”. Bankir Hindiston uchun rupiyni shunday valyutaga aylantirish vaqti kelganini aytdi.
“Menimcha, Yevropa o‘zining zaxira valyutasini ishlab chiqara olmaydi. Buyuk Britaniya yoki Yaponiya bu pozitsiyani egallashga jur’at eta olmaydi, garchi Britaniya funti ham, iyena ham erkin valyuta hisoblanadi. Menimcha, Xitoy ko‘plab mamlakatlar bilan ishonch borasida jiddiy muammoga ega”, — dedi u.
Bankir Hindistonga to‘xtalib, jahon zaxira valyutasini yaratish uchun uning mamlakati uzoq yo‘l bosib, kuchli institutlar yaratishi kerakligini ta’kidladi.
“Hindiston hech kimning injiqligiga bog‘liq bo‘lmagan tuzilma yaratishi kerak. Mexanizmlar ishonchli bo‘lishi kerak. Urinib ko‘rish vaqtimiz keldi, bunga 10 yil ketsa kerak”, — degan Mahindra.
Izoh (0)