Shavkat Mirziyoyev 28-aprel kuni Toshkent xalqaro investitsiya forumi doirasida Yevropa Ittifoqining sanksiyalar bo‘yicha maxsus vakili Devid O’Sallivan boshchiligidagi delegatsiya bilan uchrashuv o‘tkazdi.
Prezident matbuot xizmatining xabar qilishicha, suhbat davomida O‘zbekiston va YI o‘rtasidagi, eng avvalo, savdo-iqtisodiy sohadagi ko‘p qirrali sheriklikning turli jihatlari ko‘rib chiqildi. Keyingi yillarda, shu jumladan, YIning “GSP+” preferensiyalar tizimi doirasida o‘zaro savdo hajmi, qo‘shma korxonalar va investitsiya loyihalari soni oshib borayotgani mamnuniyat bilan qayd etildi.
Xalqaro kun tartibining dolzarb masalalari yuzasidan ham fikr almashilgan.
Ikkinchi Toshkent xalqaro investitsiya forumi haqida
Ikki kunlik ushbu forumda 70 mamlakatdan kelgan 2,5 mingga yaqin ishbilarmon doiralar va bank-moliya sohasi vakillari ishtirok etdi. Davlat rahbari forum doirasida yana bir qator ikki tomonlama uchrashuvlar o‘tkazdi. Tadbirning birinchi kuni Islom taraqqiyot banki prezidenti Muhammad bin Sulaymon al-Jassirni qabul qilib, hamkorlikni yanada kengaytirish masalalarini muhokama qildi.
O‘zbekistonning JSTga qo‘shilishi va innovatsion ekotizimni yaratish masalalarida texnik ko‘makni kengaytirishga alohida e’tibor qaratildi. Yevropa iqtisodiy komissiyasi ijrochi kotibi Olga Algayerova prezident bilan bo‘lgan muloqot davomida O‘zbekistonning Jahon savdo tashkilotiga a’zo bo‘lishi manfaatdor ekanini qayd etdi.
Qirg‘iziston prezidenti administratsiyasi rahbari Aqilbek Japarov bilan suhbatda Shavkat Mirziyoyev avtomobilsozlik, energetika, transport infratuzilmasi, poytaxtlarda savdo uylarini ochish bo‘yicha kooperatsiya loyihalarini tezlashtirish zarurligini ta’kidladi.
BAA energetika va infratuzilma vaziri Suxayl al-Mazruiy bilan muloqotda “yashil” iqtisodiyot, energetika, transport va logistika, qishloq xo‘jaligi, infratuzilma va boshqa ustuvor yo‘nalishlarda istiqbolli loyihalarni ilgari surish muhimligini qayd etib o‘tdi.
Saudiyaning ACWA Power kompaniyasi boshqaruvi raisi Muhammad Abdulla Abunayyan bilan o‘tkazgan uchrashuvda joriy loyihalarni amalga oshirish masalalari va sheriklikni tubdan kengaytirish imkoniyatlari ko‘rib chiqildi.
Prezident forum doirasida Vengriya iqtisodiy rivojlanish vaziri Marton Nadni ham qabul qildi. Ikki mamlakat o‘rtasidagi savdo-iqtisodiy hamkorlikni yanada rivojlantirishning birinchi galdagi chora-tadbirlari muhokama qilindi.
Izoh (0)