Shavkat Mirziyoyev 27-aprel kuni Toshkent xalqaro investitsiya forumi doirasida Islom taraqqiyot banki prezidenti Muhammad bin Sulaymon al-Jassirni qabul qildi, deb xabar bermoqda Prezident matbuot xizmati.
Xabarda aytilishicha, O‘zbekiston prezidenti ITB bilan yangi sheriklik dasturini birgalikda amalga oshirish muhimligini qayd etdi. Yangi o‘rta muddatli sheriklik dasturi doirasida Bank guruhi bilan keng ko‘lamli hamkorlikni yanada kengaytirish masalalari muhokama qilindi.
Bugungi kunda qo‘shma loyihalar portfeli iqtisodiyotning ustuvor tarmoqlarini qamrab olgan holda 1,3 milliard dollardan oshgani mamnuniyat bilan qayd etildi. Forum doirasida qishloq va transport infratuzilmasini modernizatsiya qilish, maktabgacha ta’limni rivojlantirish bo‘yicha loyihalarni amalga oshirish yuzasidan umumiy qiymati 400 million dollarlik bitimlar imzolandi.
Uchrashuvda amaliy hamkorlikni rivojlantirish, tadbirkorlik va xususiy investitsiyalarni qo‘llab-quvvatlash, moliyaviy vositalarni takomillashtirish, Bank tuzilmalarini loyiha ishlariga faol jalb qilish borasida aniq loyihalarni ilgari surish, shuningdek, O‘zbekistonning JSTga qo‘shilishi va innovatsion ekotizimni yaratish masalalarida texnik ko‘makni kengaytirishga alohida e’tibor qaratildi.
Ikkinchi Toshkent xalqaro investitsiya forumi haqida
Ushbu forum 27—28-aprel kunlari bo‘lib o‘tadi. Tadbirda 70 mamlakatdan kelgan 2,5 mingga yaqin ishbilarmon doiralar va bank-moliya sohasi vakillari ishtirok etadi. Davlat rahbari forum doirasida yana bir qator ikki tomonlama uchrashuvlar o‘tkazadi.
Prezident Shavkat Mirziyoyev ushbu forum yalpi majlisida nutq so‘zlab, xorijiy kompaniyalar va tadbirkorlar haqida gapirdi. Xususan, “yangi-yangi investorlar bilan tez-tez uchrashuvlar o‘tkazishga, sizlarning yurtimizdagi yutuqlaringizni shaxsan kafolatlashga tayyorman” deb aytdi.
O‘zbekistonda ilk bor Xalqaro tijorat sudi faoliyati yo‘lga qo‘yilishini ma’lum qildi. Mamlakat Jahon savdo tashkilotiga tezroq a’zo bo‘lib kirishdan manfaatdor ekanini qayd etdi.
Andijon, Namangan, Buxoro va Urganch aeroportlari boshqaruvini xususiy sektorga topshirilishi, temiryo‘l sohasida ham katta o‘zgarishlar boshlanganini bildirib, bunda investorlarni faol ishtirok etishga chaqirdi.
Izoh (0)