Шавкат Мирзиёев 28 апрель куни Тошкент халқаро инвестиция форуми доирасида Европа Иттифоқининг санкциялар бўйича махсус вакили Девид O’Салливан бошчилигидаги делегация билан учрашув ўтказди.
Президент матбуот хизматининг хабар қилишича, суҳбат давомида Ўзбекистон ва ЕИ ўртасидаги, энг аввало, савдо-иқтисодий соҳадаги кўп қиррали шерикликнинг турли жиҳатлари кўриб чиқилди. Кейинги йилларда, шу жумладан, ЕИнинг “GSP+” преференсиялар тизими доирасида ўзаро савдо ҳажми, қўшма корхоналар ва инвестиция лойиҳалари сони ошиб бораётгани мамнуният билан қайд этилди.
Халқаро кун тартибининг долзарб масалалари юзасидан ҳам фикр алмашилган.
Иккинчи Тошкент халқаро инвестиция форуми ҳақида
Икки кунлик ушбу форумда 70 мамлакатдан келган 2,5 мингга яқин ишбилармон доиралар ва банк-молия соҳаси вакиллари иштирок этди. Давлат раҳбари форум доирасида яна бир қатор икки томонлама учрашувлар ўтказди. Тадбирнинг биринчи куни Ислом тараққиёт банки президенти Муҳаммад бин Сулаймон ал-Жассирни қабул қилиб, ҳамкорликни янада кенгайтириш масалаларини муҳокама қилди.
Ўзбекистоннинг ЖСТга қўшилиши ва инновацион экотизимни яратиш масалаларида техник кўмакни кенгайтиришга алоҳида эътибор қаратилди. Европа иқтисодий комиссияси ижрочи котиби Олга Алгаерова президент билан бўлган мулоқот давомида Ўзбекистоннинг Жаҳон савдо ташкилотига аъзо бўлиши манфаатдор эканини қайд этди.
Қирғизистон президенти администрацияси раҳбари Ақилбек Жапаров билан суҳбатда Шавкат Мирзиёев автомобилсозлик, энергетика, транспорт инфратузилмаси, пойтахтларда савдо уйларини очиш бўйича кооперация лойиҳаларини тезлаштириш зарурлигини таъкидлади.
БАА энергетика ва инфратузилма вазири Сухайл ал-Мазруий билан мулоқотда “яшил” иқтисодиёт, энергетика, транспорт ва логистика, қишлоқ хўжалиги, инфратузилма ва бошқа устувор йўналишларда истиқболли лойиҳаларни илгари суриш муҳимлигини қайд этиб ўтди.
Саудиянинг АCWА Power компанияси бошқаруви раиси Муҳаммад Абдулла Абунайян билан ўтказган учрашувда жорий лойиҳаларни амалга ошириш масалалари ва шерикликни тубдан кенгайтириш имкониятлари кўриб чиқилди.
Президент форум доирасида Венгрия иқтисодий ривожланиш вазири Мартон Надни ҳам қабул қилди. Икки мамлакат ўртасидаги савдо-иқтисодий ҳамкорликни янада ривожлантиришнинг биринчи галдаги чора-тадбирлари муҳокама қилинди.
Изоҳ (0)