Toshkentda avtomoykadan olib qochilgan mashina YTHga uchrab, tashlab ketilgan holatda topildi
Toshkent shahar Yangihayot tumanidagi avtomoykadan olib qochilgan mashina YTHga uchrab, tashlab ketilgan holatda topildi. Bu haqda Tergov departamenti axborot xizmati xabar berdi.
Xabarga ko‘ra, 24-aprel kuni tumanning O‘zar ko‘chasida yashovchi 35 yoshli A.A. Toshkent shahar IIBBga murojaat qilgan. Unda 23-aprel kuni Sergeli 5 dahasi 2-metro bekati yonida joylashgan avtomashina yuvish shoxobchasi ishchisi Iskandar ismli shaxsga o‘ziga tegishli bo‘lgan oq rangli Lacetti rusumli avtoulovini yuvish uchun kaliti bilan tashlab ketganini aytgan.
Ertasi kuni avtoulovini olib ketish uchun kelgan vaqtida mashina va Iskandar ismli shaxs yuvish shoxobchasida yo‘qligini ko‘rib, ushbu shaxsni aniqlashda va avtomashinasini topishda amaliy yordam berishni so‘ragan.
Olib borilgan tergov-tezkor harakatlar natijasida, mazkur jinoyatni Andijon viloyatida yashovchi 20 yoshli U.I. sodir etgani aniqlangan. Jabrlanuvchiga tegishli bo‘lgan avtomashina u tomonidan Toshkent viloyati Ohangaron tumani “vodiy yo‘li”da davlat raqamlari yechilgan va yo‘l transport hodisasiga uchragan holda tashlab ketilgani aniqlandi.
Mazkur holat yuzasidan Sergeli tumani IIO FMB Tergov bo‘limi tomonidan U.I.ga nisbatan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan.
Hozirda gumonlanuvchi U.I.ni qidirib topish ishlari olib borilmoqda. Tergov harakatlari davom etmoqda.
