Shavkat Mirziyoyev 27-aprel kuni Toshkent investitsiya forumi dasturi doirasida bir qator uchrashuvlar o‘tkazdi. Bu haqda prezident matbuot xizmati xabar berdi.
Dastlab davlat rahbari Qirg‘iziston prezidenti administratsiyasi rahbari Aqilbek Japarovni qabul qildi. O‘zbekiston–Qirg‘iziston ko‘p qirrali hamkorligiga oid amaliy jihatlar muhokama qilindi.
Ikki tomonlama munosabatlarning bugungi yuksak darajasi mamnuniyat bilan qayd etildi. Jadal muloqotlar davom ettirilmoqda, muhim iqtisodiy loyihalar va gumanitar dasturlar amalga oshirilmoqda.
Hududlar forumi va Avlodlar uchrashuvini o‘tkazishga puxta tayyorgarlik ko‘rilmoqda. Prezident avtomobilsozlik, energetika, transport infratuzilmasi, poytaxtlarda savdo uylarini ochish bo‘yicha kooperatsiya loyihalarini tezlashtirish zarurligini ta’kidladi.
Shundan so‘ng Shavkat Mirziyoyev Birlashgan Arab Amirliklari energetika va infratuzilma vaziri Suxayl al-Mazruiyni qabul qildi. O‘zbekiston–BAA ko‘p qirrali hamkorligi doirasidagi loyihalarni ilgari surish masalalari ko‘rib chiqildi.
Muzokaralar avvalida vazir al-Mazruiy davlat rahbariga prezident Shayx Muhammad Ol Nahayon va Vise-prezident, Bosh vazir, Dubay amiri Shayx Muhammad Ol Maktumning salomini yetkazdi. Ikki tomonlama munosabatlar rivojining bugungi yuqori sur’ati katta mamnuniyat bilan qayd etildi.
Keyingi bir necha yilda tovar ayirboshlash ikki barobar oshdi, 50 ta yangi korxona tashkil etildi, investisiya loyihalari portfeli 3 milliard dollardan ortdi. Qo‘shma investisiya kompaniyasi muvaffaqiyatli faoliyat yuritmoqda.
Bo‘lajak oliy darajadagi uchrashuvlarga tayyorgarlik ko‘rish va ularni aniq mazmun bilan boyitish maqsadida O‘zbekiston yetakchisi “yashil” iqtisodiyot, energetika, transport va logistika, qishloq xo‘jaligi, infratuzilma va boshqa ustuvor yo‘nalishlarda istiqbolli loyihalarni ilgari surish muhimligini ta’kidladi.
Prezident Toshkent shahridagi Xalqaro investitsiya forumi doirasida Vengriya iqtisodiy rivojlanish vaziri Marton Nadni ham qabul qildi. Ikki mamlakat o‘rtasidagi savdo-iqtisodiy hamkorlikni yanada rivojlantirishning birinchi galdagi chora-tadbirlari muhokama qilindi. Tadbirkorlar va hududlar darajasidagi kooperasiyani tubdan kengaytirishga alohida e’tibor qaratildi.
Yaqin oylarda to‘g‘ridan-to‘g‘ri aviaqatnovlarni yo‘lga qo‘yish, chuqurlashgan sanoat kooperasiyasi uchun mo‘ljallangan tuzilma shartlarini tez fursatda kelishish va faoliyatini boshlash muhim ekani ta’kidlandi. Qishloq xo‘jaligi, farmasevtika, transport va kommunikasiyalar, samarali moliyaviy vositalarni yaratish borasidagi loyihalarni tayyorlash va amalga oshirish ishlarini tezlashtirishga kelishib olindi.
Shavkat Mirziyoyev Saudiyaning “ACWA Power” kompaniyasi boshqaruvi raisi Muhammad Abdulla Abunayyan bilan o‘tkazgan uchrashuvda joriy loyihalarni amalga oshirish masalalari va sheriklikni tubdan kengaytirish imkoniyatlari ko‘rib chiqildi. Davlat rahbari O‘zbekistonning “yashil” energetika tarmog‘i rivojiga eng ko‘p sarmoya kiritayotgan ushbu kompaniya bilan hamkorlik sermahsul bo‘layotganini mamnuniyat bilan qayd etdi.
Bugungi kunda muqobil energetika sohasida 7,5 milliard dollarlik loyihalar amalga oshirilmoqda. Bundan tashqari, quyosh va shamol elektr stansiyalarini qurish, “yashil” vodorod ishlab chiqarish bo‘yicha yangi loyihalar faol tayyorlanmoqda. Suhbat chog‘ida kooperasiyani yanada chuqurlashtirish, birinchi navbatda innovasion loyihalarni, shu jumladan O‘zbekiston–Saudiya Ishbilarmonlar kengashi doirasida ilgari surish istiqbollari muhokama qilindi.
Shavkat Mirziyoyev 27-aprel kuni ikkinchi Toshkent xalqaro investisiya forumi doirasida BMT bosh kotibining o‘rinbosari, Yevropa iqtisodiy komissiyasi (YIK) Ijrochi kotibi Olga Algayerovani qabul qildi. Uchrashuvda barqaror rivojlanish maqsadlariga tezkor erishish borasida BMT institutlari, shu jumladan, YIK bilan ko‘p qirrali hamkorlikni rivojlantirish masalalari ko‘rib chiqildi.
Markaziy Osiyo mintaqasi mamlakatlari uchun maxsus dastur doirasida samarali hamkorlik qilinayotgani mamnuniyat bilan qayd etildi. Tomonlar O‘zbekistonning Jahon savdo tashkilotiga a’zo bo‘lishi hamda “Yashil makon” dasturini, yuk tashishlarni raqamlashtirish va to‘qimachilik sanoati loyihalarini amalga oshirish masalalarida almashinuvlarni davom ettirishdan manfaatdor ekanini ta’kidladi. Suhbatda BMT YIK bilan ustuvor yo‘nalishlarda hamkorlikni yanada kengaytirish masalalari ham muhokama qilindi.
Izoh (0)