“10 nafar chaqqon bola korimizga yaradi”. Ochiq budjetdan 2 mlrd so‘m yutib olgan buxorolik mahalla raisi ko‘p ovoz to‘plash sirini ochdi

Buxoro viloyatining G‘ijduvon tumanidagi “Qassabon” mahalla fuqarolar yig‘ini aholisi ochiq budjetda yetarli darajada ovoz to‘plab, ikkita loyiha uchun 2 milliard so‘m mablag‘ni qo‘lga kiritdi. Iqtisodiyot va moliya vazirligida bo‘lib o‘tgan taqdirlash marosimida mahalla raisi ko‘p ovoz to‘plash sirlarini fosh qildi. Bu haqda tadbirda ishtirok etgan “Daryo” muxbiri xabar bermoqda.

Maʼlum bo‘lishicha, 28-aprel kuni vazirlikda “Ochiq budjet” axborot portali orqali eʼlon qilingan “Tashabbusli budjet” loyihasining 2023-yil birinchi mavsumida faol ishtirok etgan hokim yordamchilari va fuqarolarni taqdirlash marosimi bo‘lib o‘tgan.

Tadbirda so‘z olgan mahalla raisi “Tashabbusli budjet”ning joriy mavsumida ikkita loyihani ilgari surib, mahalladagi yo‘l taʼmiri uchun 900 million so‘m, maktab taʼmiri uchun esa 1 milliard 100 million so‘m mablag‘ yutib olganini bildirdi.

“Biz ‘Tashabbusli budjet’ning taʼmini totib ko‘rganmiz. Mazkur tashabbus boshlanganidan beri g‘oliblikni qo‘lga kiritamiz. Tashabbus boshlandi, deyishlari bilan mahallamizda 10 nafar oldindan tayyorlab qo‘yilgan chaqqon bolalarni hududlarga chiqarib, ovoz yig‘ishni boshlaymiz. Bu mavsumda ham shu o‘n nafar chaqqon bola qisqa fursatda 6 mingga yaqin ovoz to‘pladi. Joriy yilgi birinchi mavsumda ham maktab taʼmiri uchun 1 milliard 100 million so‘m, mahalla yo‘li taʼmiri uchun 900 million so‘m mablag‘ni qo‘lga kiritdik. Ilgari mahalladagi yo‘l taʼmiri kabi muammoli holatlar haqida gap ochsak, mablag‘ yo‘q, dasturga tushishi kerak, degan turli bahonalar bo‘lardi. Bu loyiha orqali harakat qilsak, o‘zimiz uddalashimiz mumkinligini bildik”, — deydi “Qassabon” MFY raisi Oybek Jo‘rayev.

Tadbirda taʼkidlanishicha, o‘tgan 2021—2022-yillar davomida “Tashabbusli budjet” loyihalari uchun davlat budjetidan qariyb 3 trillion so‘m mablag‘ yo‘naltirilgani, mazkur mablag‘lar doirasida jami 5730 ta loyiha g‘olib deb topilib, to‘rt mingga yaqin mahallalarda ijtimoiy muammolar bartaraf etilgani maʼlum qilindi.

“Xususan, 2,5 mingdan ortiq maktab, bog‘cha va tibbiyot tashkilotlari taʼmirlandi va jihozlandi. 1500 ga yaqin ko‘chalar asfaltlanib yo‘llar tartibga keltirildi va 300 ga yaqin mahallalarda ichimlik suvi taʼminoti yaxshilandi”, — deydi tadbir tashkilotchilari.