“10 нафар чаққон бола коримизга яради”. Очиқ бюджетдан 2 млрд сўм ютиб олган бухоролик маҳалла раиси кўп овоз тўплаш сирини очди

Бухоро вилоятининг Ғиждувон туманидаги “Қассабон” маҳалла фуқаролар йиғини аҳолиси очиқ бюджетда етарли даражада овоз тўплаб, иккита лойиҳа учун 2 миллиард сўм маблағни қўлга киритди. Иқтисодиёт ва молия вазирлигида бўлиб ўтган тақдирлаш маросимида маҳалла раиси кўп овоз тўплаш сирларини фош қилди. Бу ҳақда тадбирда иштирок этган “Дарё” мухбири хабар бермоқда.

Маълум бўлишича, 28 апрель куни вазирликда “Очиқ бюджет” ахборот портали орқали эълон қилинган “Ташаббусли бюджет” лойиҳасининг 2023 йил биринчи мавсумида фаол иштирок этган ҳоким ёрдамчилари ва фуқароларни тақдирлаш маросими бўлиб ўтган.

Тадбирда сўз олган маҳалла раиси “Ташаббусли бюджет”нинг жорий мавсумида иккита лойиҳани илгари суриб, маҳалладаги йўл таъмири учун 900 миллион сўм, мактаб таъмири учун эса 1 миллиард 100 миллион сўм маблағ ютиб олганини билдирди.

“Биз ‘Ташаббусли бюджет’нинг таъмини тотиб кўрганмиз. Мазкур ташаббус бошланганидан бери ғолибликни қўлга киритамиз. Ташаббус бошланди, дейишлари билан маҳалламизда 10 нафар олдиндан тайёрлаб қўйилган чаққон болаларни ҳудудларга чиқариб, овоз йиғишни бошлаймиз. Бу мавсумда ҳам шу ўн нафар чаққон бола қисқа фурсатда 6 мингга яқин овоз тўплади. Жорий йилги биринчи мавсумда ҳам мактаб таъмири учун 1 миллиард 100 миллион сўм, маҳалла йўли таъмири учун 900 миллион сўм маблағни қўлга киритдик. Илгари маҳалладаги йўл таъмири каби муаммоли ҳолатлар ҳақида гап очсак, маблағ йўқ, дастурга тушиши керак, деган турли баҳоналар бўларди. Бу лойиҳа орқали ҳаракат қилсак, ўзимиз уддалашимиз мумкинлигини билдик”, — дейди “Қассабон” МФЙ раиси Ойбек Жўраев.

Тадбирда таъкидланишича, ўтган 2021—2022 йиллар давомида “Ташаббусли бюджет” лойиҳалари учун давлат бюджетидан қарийб 3 триллион сўм маблағ йўналтирилгани, мазкур маблағлар доирасида жами 5730 та лойиҳа ғолиб деб топилиб, тўрт мингга яқин маҳаллаларда ижтимоий муаммолар бартараф этилгани маълум қилинди.

“Хусусан, 2,5 мингдан ортиқ мактаб, боғча ва тиббиёт ташкилотлари таъмирланди ва жиҳозланди. 1500 га яқин кўчалар асфальтланиб йўллар тартибга келтирилди ва 300 га яқин маҳаллаларда ичимлик суви таъминоти яхшиланди”, — дейди тадбир ташкилотчилари.