Sirdaryo tumanida xonandani radio va ko‘rsatuvga olib chiqishini aytib, uni chuv tushirgan andijonlik yigit qo‘lga tushdi. Bu haqda Tergov departamenti axborot xizmati xabar berdi.
Xabarga ko‘ra, 24-mart kuni Sirdaryo tumani A.Temur ko‘chasida yashovchi 39 yoshli X.Sh. ariza bilan murojaat qilgan. Unda nomaʼlum bo‘lgan shaxs uning telefon raqamiga qo‘ng‘iroq qilib, o‘zini “Vodiy sadosi” radiosida ishlovchi Muzaffar Ochilov deb tanishtirib, uning qo‘shiqlarini radioda reklama qilib berish evaziga undan ikki marotaba 1 200 000 so‘mdan jami 2 400 000 so‘m olgani aytilgan.
Shuningdek, Zo‘rTV kanaliga chiqarib berish uchun 400 000 so‘m pullarini plastik kartasiga tashlash yo‘li bilan qo‘lga kiritganidan so‘ng vaʼdasiga ko‘ra uning qo‘shiqlarini radioda reklama qilib bermasdan, aldab ketgan.
Olib borilgan tergov-tezkor harakatlari natijasida, Muzaffar Ochilov deb o‘zini tanishtirgan shaxs aslida hech qayerda ishlamaydigan, Andijon viloyatida yashovchi 28 yoshli Y.O. ekanligi aniqlangan.
Mazkur holat yuzasidan Sirdaryo tumani IIB huzuridagi Tergov bo‘limi tomonidan Y.O.ga nisbatan Jinoyat kodeksining 168-moddasi 3-qismi “b” bandi (firibgarlik) bilan jinoyat ishi qo‘zg‘atilgan. Tergov harakatlari davom etmoqda.
Shu kabi holat avvalroq Samarqandda sodir etilgan edi. Fuqaro samarqandlik san’atkorga qo‘ng‘iroq qilib, o‘zini Zo‘rTV telekanalida efirga uzatilib borilayotgan “Xafa bo‘lish yo‘q” ko‘rsatuvining boshlovchisi, deb tanishtirgan. Ushbu ko‘rsatuvga chiqarishni va’da qilib, 1,5 million so‘m pulni o‘tkazib olgan. Shundan so‘ng g‘oyib bo‘lgan. Ushbu jinoyatni Andijon viloyati Marhamat tumanida yashovchi yigit sodir etgani ma’lum bo‘lgan edi.
Izoh (0)