Сирдарё туманида хонандани радио ва кўрсатувга олиб чиқишини айтиб, уни чув туширган андижонлик йигит қўлга тушди. Бу ҳақда Тергов департаменти ахборот хизмати хабар берди.
Хабарга кўра, 24 март куни Сирдарё тумани А.Темур кўчасида яшовчи 39 ёшли Х.Ш. ариза билан мурожаат қилган. Унда номаълум бўлган шахс унинг телефон рақамига қўнғироқ қилиб, ўзини “Водий садоси” радиосида ишловчи Музаффар Очилов деб таништириб, унинг қўшиқларини радиода реклама қилиб бериш эвазига ундан икки маротаба 1 200 000 сўмдан жами 2 400 000 сўм олгани айтилган.
Шунингдек, Zo‘rTV каналига чиқариб бериш учун 400 000 сўм пулларини пластик картасига ташлаш йўли билан қўлга киритганидан сўнг ваъдасига кўра унинг қўшиқларини радиода реклама қилиб бермасдан, алдаб кетган.
Олиб борилган тергов-тезкор ҳаракатлари натижасида, Музаффар Очилов деб ўзини таништирган шахс аслида ҳеч қаерда ишламайдиган, Андижон вилоятида яшовчи 28 ёшли Ю.О. эканлиги аниқланган.
Мазкур ҳолат юзасидан Сирдарё тумани ИИБ ҳузуридаги Тергов бўлими томонидан Ю.О.га нисбатан Жиноят кодексининг 168-моддаси 3-қисми “б” банди (фирибгарлик) билан жиноят иши қўзғатилган. Тергов ҳаракатлари давом этмоқда.
Шу каби ҳолат аввалроқ Самарқандда содир этилган эди. Фуқаро самарқандлик санъаткорга қўнғироқ қилиб, ўзини Zo‘rTV телеканалида эфирга узатилиб борилаётган “Хафа бўлиш йўқ” кўрсатувининг бошловчиси, деб таништирган. Ушбу кўрсатувга чиқаришни ваъда қилиб, 1,5 миллион сўм пулни ўтказиб олган. Шундан сўнг ғойиб бўлган. Ушбу жиноятни Андижон вилояти Марҳамат туманида яшовчи йигит содир этгани маълум бўлган эди.
Изоҳ (0)