Andijonda majburiy mehnatga jalb qilinib, YTHda o‘lgan ayol voqeasi: masʼullar xodimlarini kechasi ishga chaqirganini tan olmayapti

Marhamat tumanida hokim topshirig‘iga ko‘ra, ishdan tashqari vaqt — kechasi 21:00 dan keyin ishga chaqirilgan obodonlashtirish xodimi yo‘lda YTHga uchrab, vafot etgani xabar qilingandi. “Daryo” manbasi tuman Obodonlashtirish boshqarmasi xodimlari 25-aprel kuni kechki payt soat 21:00 dan keyin shoir Muhammad Yusuf qabrini obodonlashtirish uchun majburiy mehnatga jalb qilinganini bildirdi.

“Daryo” muxbiri voqea tafsilotlariga aniqlik kiritish maqsadida jurnalistik surishtiruv o‘tkazdi.

Marhuma Arofatxon Jaloliddinovaning turmush o‘rtog‘i Iminjon Mamajonovning aytishicha, o‘sha kuni kechki payt brigada boshlig‘i xotiniga telefon qilib, tungi 02:00 da ishga chiqishlari kerakligini aytgan. Keyin yana telefon qilib, kechki payt 21:00 larda mashina yuborishini, ishga chiqishlari kerakligini aytgan.

“O‘sha kuni ishdan ertaroq kelib, biroz mol boqib, kirini ham yuvdi. Keyin biroz dam oldi. Keyin ishxonasidan telefon qilishdi. Shunda ularga soat tungi 02:00 da boramiz, deyishdi. Qo‘ng‘iroq qilganlar sherigingni aytgin, kelib sen bilan uyingda yotsin, degan. Shundan keyin soat 19:00 larda xotinimning hamkasb sherigi biznikiga keldi. Uxlashayotganida yana qo‘ng‘iroq qilib, tezda yetib kelinglar, mashina boryapti, debdi. Tezda ko‘cha boshiga chiqib turinglar, deyishgani uchun shoshilib chiqib ketishdi. Orqasidan qaynsinglisi chiqqanida hech qancha o‘tmasdan yomon xabar keldi. Aytishlaricha, do‘konning oldiga borib, mashina bordi, deyishganida yo‘lning narigi tomoniga o‘tayotganida Matiz yoki Spark kelib urgan”, — deydi marhumaning turmush o‘rtog‘i.

Iminjon Mamajonovning taʼkidlashicha, xotinini ishdan tashqari vaqtlarda, ayniqsa, kechki paytlarda ishga chaqirib turish holatlari ko‘p bo‘lgan. 

Jabrlanuvchi Enaxon Butaqulovaning turmush o‘rtog‘i Hokim Jo‘rayevning aytishicha, ayoli uydan Muhammad Yusuf tug‘ilgani kuni munosabati bilan gul ekishga borishini aytib, chiqib ketgan.

“Kechki payt soat 17:00 larda ishdan keldi. Kelib uydagi mayda-chuyda ishlarni qildi. Keyin kun kech bo‘ldi. Bir payt ketaman dedi. Nimaga desam, Arofat o‘rtog‘im qo‘ng‘iroq qildi, ertaga Muhammad Yusufning tug‘ilgan kuni ekan, gul ekishga borar ekanmiz, shunga erta tongdan chiqib ketadigan bo‘ldik, dedi. Mayli, deb ruxsat berdim. Keyin menga kechqurun ishga ketayotganda mashina urib yuborgani haqida xabar keldi. Eshitiboq jiyanim bilan birga kasalxonaga bordik.

Bir narsani tushunmayapman, bular kechasi o‘zidan o‘zi gul ekishga chiqib ketmaydi-ku. Kimdir ishga chaqirgani uchun borgan. Vaholanki, oldin ham ancha-muncha kech qolish holatlari bo‘lar edi. Ishinglar davlat ishi bo‘lsa, nega grafik asosida ishlamaysizlar, desam, rahbarimiz shunaqa ekan-da, derdi. Hattoki yakshanba kuni ham chaqirishsa, borib ishlashardi. Bo‘lmasa shu ishlarni dushanba kuni qilishsa ham bo‘lardi. Yo‘q, ularga ish vaqti bo‘lmagan”, — deydi Hokimjon Jo‘rayev.

Obodonlashtirish boshqarmasi shahar brigadasi boshlig‘i Manzuraxon Ismoilovaning aytishicha, ayollarni boshqarmaning kadrlar bo‘limi boshlig‘i ulardan nasiya olingan mahsulotlarning pullarini olish uchun chaqirgan bo‘lgan. Voqea shunda yuz bergan. Ayollar o‘sha kuni ishga jalb qilinmagan.

“Ishchilarimizni biz kechki paytda ishga jalb qilganimiz yo‘q. Shaxsan men kecha soat 16:00 larda ishdan qaytib, nabiramning mazasi yo‘qligi uchun uyga ketgandim. Ertalab kelsam shu voqea bo‘lganini aytishdi. Eshitganimga qaraganda, kadrimiz Maktubaxonning ular bilan ozgina aloqasi bor ekan, shuni olib chiqib bering, deganida olib chiqayotgan joyi ekan. Menga kadrimiz mana shunday dedi. Men ularning brigadiriman, ularni ishga jalb qilmaganman. Surishtirsam boshqalar ham jalb qilmagan. Bu gaplar qayerdan chiqdi, kim biladi, bilmaymiz. Lekin mana shu hududlar, shahar bizga qaraydi. Qizlarga bo‘lib-bo‘lib berganmiz”, — deydi Manzuraxon Ismoilova.

Suhbat davomida Manzuraxon Ismoilovadan Maktubaxon va jabrlanuvchi ayollarning telefon raqamlarini so‘raganimizda telefonida ko‘rib, yozib olishimiz mumkinligini aytdi. Shunda qo‘ng‘iroqlar tarixida 18:00 dan 18:25 oralig‘ida YTHda jabrlangan va vafot etgan ayolga qo‘ng‘iroq qilingani, ammo dastlab ayollar javob bermagani, biroq Arofatxon Jaloliddinova qaytib qo‘ng‘iroq qilganidan so‘ng u bilan 2 daqiqa-yu 23 soniya suhbatlashganini ko‘rish mumkin.

Tuman tibbiyot birlashmasi shoshilinch tez yordam bo‘limi vrach-travmatologi Bobur Imomovning aytishicha, Enaxon Bo‘taqulova shifoxonaga o‘ta og‘ir ahvolda olib kelingan. Zudlik bilan operatsiya stoliga yotqizilib, uch soatdan oshiq operatsiya qilingan.

“Bizga o‘sha kuni To‘lg‘a mahalla fuqarolar yig‘inidan avtohalokat natijasida tan jarohati olgan ikki nafar fuqaro olib kelingan. Bittasi biologik o‘lik holda keldi. Ikkinchisi o‘ta og‘ir tan jarohati bilan olib kelindi. Shu bemorni ko‘rganimizda ikkala oyoqda sinish, qorin bo‘shlig‘i aʼzolari lat yegani, qon bosimi esa nol ekanligi aniqlandi. Shundan so‘ng zudlik bilan bemor jonlantirish bo‘limiga yotqizilib, barcha reanimatsion chora-tadbirlar amalga oshirilib, jarrohlik stoliga olindi. Uch soat operatsiya qilinib, singan suyaklar gips qilindi. Bemor hozir yaxshi, o‘zgarish bor. Hushiga kelgan, ancha tuzuk”, — deydi vrach travmatolog Bobur Imomov.

“Daryo” muxbiri Marhamat tumani hokimligi Obodonlashtirish boshqarmasi boshlig‘i Adhamjon Qo‘chqorov, boshqarmaning obodonlashtirish bo‘yicha bo‘lim boshlig‘i Hamidjon Haydarovlar bilan ham telefon orqali bog‘landi. Ularning ikkisi ham olisda ekanini, savollarga telefon orqali javob berishlarini bildirishgan.

Adhamjon Qo‘chqorovning aytishicha, qabristonda gul ekish ishlari 25 kun avval olib borilgan. Qolgan tozalov ishlari qabriston qorovullari tomonidan amalga oshirib kelingan.

“O‘n besh kundan beri Muhammad Yusufning tavalludiga tayyorgarlik ko‘rib kelyapmiz. Ish vaqtimiz ertalab soat 08:00 dan kechki soat 17:00 gacha. Boshqa payt birorta insonni ishga jalb qilmaymiz. 25 kun oldin Muhammad Yusufning qabristonini tayyorlab bo‘lganmiz. Qabristonga borsangiz, ko‘rasiz. Odatda hamma ketib bo‘lgandan keyin atrofdagi qabriston qorovullari choyini ichib bo‘lib, supurgini olib, supurib tayyorgarlik ko‘rishadi. Kimdir chiqindi teradi, yana biri muzqaymoq qog‘ozini. O‘sha kuni men hech kimni chaqirmaganman, hech kim ularni chaqirmagan. Bilmadim, nega ishga kelishmoqchi bo‘lishgan. Kim chaqirganini esa men bilmayman”, — deydi Adhamjon Qo‘chqorov.

Marhamat tumani hokimi Bobur Yo‘ldoshev ham hech kimga kechasi ishga chiqish bo‘yicha topshiriq bermaganini aytmoqda.

“Daryo” voqealar rivojini kuzatishda davom etadi.