Samarqand shahrida xonandani ko‘rsatuvga chiqarib berish evaziga 1,5 million so‘mga chuv tushirgan andijonlik yigit qo‘lga tushdi. Bu haqda viloyat Ichki ishlar boshqarmasi axborot xizmati xabar berdi.
Xabarga ko‘ra, fuqaro samarqandlik sanʼatkorga qo‘ng‘iroq qilib, o‘zini Zo‘r TV telekanalida efirga uzatilib borilayotgan “Xafa bo‘lish yo‘q” ko‘rsatuvining boshlovchisi, deb tanishtirgan. Ushbu ko‘rsatuvga chiqarishni vaʼda qilib, 1,5 million so‘m pulni o‘tkazib olgan. Shundan so‘ng g‘oyib bo‘lgan.
Xonanda esa Samarqand shahar Ichki ishlar organlari faoliyatini muvofiqlashtirish boshqarmasiga ariza bilan murojaat qilib, ushbu shaxsga nisbatan qonuniy chora ko‘rilishini so‘ragan.
Viloyat IIB tezkor qidiruv boshqarmasi, kiberxavfsizlik bo‘limi xodimlarining tezkor qidiruvi natijasida mazkur firibgarlik jinoyati fosh etilgan. Uni Andijon viloyati Marhamat tumanida yashovchi yigit sodir etgani maʼlum bo‘ldi. Unga nisbatan Jinoyat kodeksining 168-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda.
Izoh (0)