Tashrif bilan Lyuksemburgda bo‘lib turgan O‘zbekiston tashqi ishlar vaziri Baxtiyor Saidov Yevropa Ittifoqining Tashqi ishlar va xavfsizlik siyosati bo‘yicha oliy vakili, Yevropa komissiyasi vitse-prezidenti Jozep Borrel bilan muzokaralar o‘tkazdi. Bu haqda Saidov o‘zining Twitter’dagi sahifasi orqali ma’lum qildi.
“Yevropa Ittifoqining Tashqi ishlar va xavfsizlik siyosati bo‘yicha oliy vakili, Yevropa komissiyasi vitse-prezidenti Josep Borrel janobi oliylari bilan o‘tkazgan samimiy muzokaralarimizda Yevropa Ittifoqi—Markaziy Osiyo mintaqalararo aloqalari, O‘zbekistondagi muhim islohotlarni qo‘llab-quvvatlashda hamkorlikni kengaytirish masalalarini muhokama qildik”, — deb yozdi Baxtiyor Saidov.
2022-yilning noyabrida Shavkat Mirziyoyev Jozep Borrelni qabul qilib, pandemiyadan keyingi davrda jadal iqtisodiy tiklanish va mintaqalararo o‘zaro bog‘liqlikni rivojlantirish maqsadida O‘zbekiston bilan YI o‘rtasidagi sheriklikni yanada chuqurlashtirish masalalari muhokama qilgan edi.
18-aprel kuni O‘zbekiston TIV rahbari Baxtiyor Saidov Yevropa Ittifoqining Markaziy Osiyo va inson huquqlari bo‘yicha maxsus vakillari Terhi Xakala va Imon Gilmor bilan muzokaralar o‘tkazgandi. Muloqot chog‘ida O‘zbekiston bilan Yevropa Ittifoqi o‘rtasidagi siyosiy, savdo-iqtisodiy, madaniy-gumanitar va boshqa sohalardagi munosabatlarning dolzarb jihatlari ko‘rib chiqilgan. Fuqarolik jamiyatini rivojlantirish, inson huquqlari, gender tengligi va so‘z erkinligini ta‘minlashda o‘zaro hamkorlik masalalari yuzasidan fikr almashilgan.
Izoh (0)