O‘zbekistonda oxirgi haftada yangi hosil piyozining ulgurji narxlari 2 barobar pasaygan, bu ichki bozorda ushbu mahsulotni yetkazib berish hajmi keskin oshgani bilan izohlanadi, deb xabar bermoqda EastFruit tahlilchilari. O‘z navbatida, mazkur holat o‘tgan yilgi piyoz hosili narxiga ham taʼsir qilib, bu mahsulotning ulgurji narxlari ayni davrda 17 foizga pasaygan.
Narxlar monitoringiga ko‘ra, 14-apreldan 21-aprelga qadar yangi hosil piyozining o‘rtacha ulgurji narxi 1 kilogramm uchun 8000 dan 4000 so‘mga pasaygan va joriy o‘rtacha ulgurji narx 2022-yilning xuddi shu sanasida qayd etilgan darajaga teng bo‘lgan.
“Agar ushbu mahsulot narxlari haftalik monitoring olib boriladigan boshqa mamlakatlar bilan solishtirilsa, O‘zbekistonda yangi piyoz hosilining o‘rtacha ulgurji narxi Gruziyaga (0,99 dollar/kg) nisbatan 2,8 barobar past, lekin Tojikistonga (0,27 dollar/kg) nisbatan 30 foizga yuqoridir”, — deyiladi xabarda.
Oxirgi hafta o‘tgan yilgi piyozning ulgurji narxlari ham pasaygan, bu O‘zbekiston ichki bozorida yangi hosil piyozi bo‘yicha taklif keskin oshgani o‘tgan yilgi piyoz narxiga taʼsir ko‘rsatayotgani bilan izohlanadi. 14-aprelidan 21-apreliga qadar ushbu mahsulotning o‘rtacha ulgurji narxi 1 kilogramm uchun 6000 dan 5000 so‘mga pasaygan. Shu bilan birga, o‘tgan yilgi piyozning o‘rtacha ulgurji narxi o‘tgan yilning shu sanasiga nisbatan qariyb bir yarim barobar yuqori.
O‘zbekistonda o‘tgan yilgi hosil piyozining amaldagi ulgurji narxlari EastFruit meva-sabzavot mahsulotlarining ulgurji narxlarini haftalik monitoring qilib boradigan mamlakatlar orasida eng past ko‘rsatkich hisoblanadi. 21-aprel holatiga ko‘ra, mintaqa mamlakatlarida o‘tgan yilgi piyozning o‘rtacha ulgurji narxi (1 kilogramm uchun AQSH dollarida): O‘zbekiston – 0,44 dollar; Tojikiston — 0,60 dollar; Moldova — 0,83 dollar; Polsha — 0,83 dollar; Gruziya — 0,99 dollar; Ukraina — 1,15 dollar.
Piyoz narxining keskin o‘sishi, aholining ichki iste’mol talabini qondirish hamda oziq-ovqat xavfsizligini ta’minlash maqsadida hukumat topshirig‘i bilan 1-yanvardan piyoz eksportiga vaqtincha cheklov o‘rnatilgandi. Ushbu cheklov 4 oy amal qilishi belgilangandi O‘zbekistonda 15-martdan piyoz eksportiga qo‘yilgan vaqtinchalik cheklov bekor qilindi. Ma’lumot uchun, O‘zbekistondan tashqari, Qozog‘iston, Tojikiston va Qirg‘izistonda ham piyoz eksporti cheklangandi. Qirg‘iziston Markaziy Osiyoda piyoz eksportiga qo‘yilgan taqiqni muddatidan oldin (3-martdan) bekor qilgan birinchi davlat bo‘ldi.
Izoh (0)