O‘zbekiston TIV rahbari Baxtiyor Saidov Yevropa Ittifoqining Markaziy Osiyo va inson huquqlari bo‘yicha maxsus vakillari Terhi Xakala va Imon Gilmor bilan muzokaralar o‘tkazdi. Bu haqda Tashqi ishlar vazirligi matbuot xizmati xabar berdi.
Qayd etilishicha, muloqot chog‘ida O‘zbekiston bilan Yevropa Ittifoqi o‘rtasidagi siyosiy, savdo-iqtisodiy, madaniy-gumanitar va boshqa sohalardagi munosabatlarning dolzarb jihatlari ko‘rib chiqilgan. Fuqarolik jamiyatini rivojlantirish, inson huquqlari, gender tengligi va so‘z erkinligini ta‘minlashda o‘zaro hamkorlik masalalari yuzasidan fikr almashilgan.
O‘zbekiston va Yevropa Ittifoqi o‘rtasida Kengaytirilgan sheriklik va hamkorlik to‘g‘risidagi bitimni tezroq imzolash muhimligi qayd etilgan.
Shuningdek, O‘zbekiston—Yevropa Ittifoqi va Markaziy Osiyo—Yevropa Ittifoqi shaklida turli darajalarda rejalashtirilgan tadbirlar jadvaliga alohida e‘tibor qaratilgan.
“Uchrashuvda mintaqaviy va xalqaro siyosatning ayrim masalalari ham ko‘rib chiqildi”, — deyiladi xabarda.
13-aprel kuni Samarqandda Afg‘onistonga qo‘shni davlatlar vazirlarining to‘rtinchi uchrashuvi bo‘lib o‘tgandi. O‘zbekiston raisligida o‘tgan tadbirda Eron, Pokiston, Rossiya, Tojikiston, Turkmaniston va Xitoy tashqi siyosat idoralari rahbarlari ishtirok etdi va tomonlar Afg‘onistondagi mavjud vaziyat, mamlakatning amaldagi rasmiylari tomonidan jahon hamjamiyatining asosiy talablari — inklyuziv hukumat yaratish, afg‘onistonlik ayollarning mehnat va ta’lim olish imkoniyatini hamda milliy ozchiliklarning huquqlarini ta’minlash kabi asosiy talablarning bajarilishi muhokama qilindi.
Izoh (0)