Ташриф билан Люксембургда бўлиб турган Ўзбекистон ташқи ишлар вазири Бахтиёр Саидов Европа Иттифоқининг Ташқи ишлар ва хавфсизлик сиёсати бўйича олий вакили, Европа комиссияси вице-президенти Жозеп Боррел билан музокаралар ўтказди. Бу ҳақда Саидов ўзининг Twitter’даги саҳифаси орқали маълум қилди.
“Европа Иттифоқининг Ташқи ишлар ва хавфсизлик сиёсати бўйича олий вакили, Европа комиссияси вице-президенти Жосеп Боррел жаноби олийлари билан ўтказган самимий музокараларимизда Европа Иттифоқи—Марказий Осиё минтақалараро алоқалари, Ўзбекистондаги муҳим ислоҳотларни қўллаб-қувватлашда ҳамкорликни кенгайтириш масалаларини муҳокама қилдик”, — деб ёзди Бахтиёр Саидов.
2022 йилнинг ноябрида Шавкат Мирзиёев Жозеп Боррелни қабул қилиб, пандемиядан кейинги даврда жадал иқтисодий тикланиш ва минтақалараро ўзаро боғлиқликни ривожлантириш мақсадида Ўзбекистон билан ЕИ ўртасидаги шерикликни янада чуқурлаштириш масалалари муҳокама қилган эди.
18 апрель куни Ўзбекистон ТИВ раҳбари Бахтиёр Саидов Европа Иттифоқининг Марказий Осиё ва инсон ҳуқуқлари бўйича махсус вакиллари Терҳи Хакала ва Имон Гилмор билан музокаралар ўтказганди. Мулоқот чоғида Ўзбекистон билан Европа Иттифоқи ўртасидаги сиёсий, савдо-иқтисодий, маданий-гуманитар ва бошқа соҳалардаги муносабатларнинг долзарб жиҳатлари кўриб чиқилган. Фуқаролик жамиятини ривожлантириш, инсон ҳуқуқлари, гендер тенглиги ва сўз эркинлигини таъминлашда ўзаро ҳамкорлик масалалари юзасидан фикр алмашилган.
Изоҳ (0)