“Toshshahartransxizmat” yangi avtobuslar uchun haydovchilardan pul talab qilinayotgani haqida ijtimoiy tarmoqlarda tarqalgan xabarlarga munosabat bildirdi.
Facebook’da joylangan postda “7-avtobus saroyi” fililali tasarrufidagi 94 va 98-sonli avtobus yo‘nalishlariga biriktirilgan yangi avtobuslarni olish uchun haydovchilardan 150-200 dollar pul talab qilinayotgani aytilgan. “Toshshahartransxizmat” matbuot xizmati bunga javoban faktlarga asoslanmagan maʼlumotlarni tarqatmaslikni so‘radi.
Qayd etilishicha, hozirda “Jamoat transporti tizimini isloh qilish chora-tadbirlari to‘g‘risida”gi prezident qaroriga asosan, “Toshshahartransxizmat”AJ va filiallari tasarrufiga xarid qilinayotgan yangi Yutong va King Long rusumli yo‘lovchi tashuvchi avtobuslarni haydovchilarga biriktirish bo‘yicha maxsus buyruq qabul qilingan bo‘lib, ushbu buyruqqa asosan “Haydovchilarni ishga qabul qilish hamda ularni avtobus va elektrobuslarga biriktirish bo‘yicha nizom” tasdiqlangan.
Ushbu nizom asosida Avtobus saroyi filiallarining har birida Ichki ishlar xodimi, Harakat xavfsizligi boshqarmasi (HXB) xodimi, bosh muhandis, taʼmirlash ustaxonasi boshlig‘i va tasarruf bo‘limi xodimlaridan tashkil topgan ishchi guruh aʼzolari tomonidan haydovchilarni yangi avtobus va elektrobuslarga biriktirishda ochiq suhbat o‘tkazilib shaffoflik va halollik printsiplariga tayangan holda suhbat jarayonlari onlayn video tasvirga oluvchi moslamada tasvirga olib borilmoqda.
“Bunda haydovchilarni bir nechta ustivor tamoyillar asosida avtobuslarga biriktirish belgilangan, yaʼni, masʼul xodimlar tomonidan eʼtiborga molik tomonlar haydovchining so‘nggi uch yil mobaynida sodir etgan qoidabuzarliklari va yo‘l-transport hodisalari, muqaddam boshqargan transport vositalarining taʼmirlash ishlarida faolligi hamda so‘nggi uch yil mobaynida haydovchi tomonidan yo‘nalishda yo‘lovchilarga nisbatan qo‘pol munosabatda bo‘lgan yoki yo‘qligi yaʼni, “Toshshahartransxizmat”ning qisqa 1062 ishonch telefoni orqali kelib tushgan murojaatlar inobatga olingan holda eng yaxshi va yuqori ko‘rsatkichlarga ega bo‘lgan haydovchilar yangi xarid qilinayotgan avtobuslarga biriktirilayotganini maʼlum qilamiz”, — deyiladi munosabatda.
Shuningdek, korrupsion holatlar mavjudligini tasdiqlovchi faktlarga asoslangan maʼlumotlar mavjud bo‘lsa “Toshshahartransxizmat”ning Korrupsiyaga qarshi kurashish bo‘limiga +998 (71) 230-71-05 murojaat qilish mumkinligi qo‘shimcha qilingan.
Har bir holat bo‘yicha xizmat tekshiruvi eʼlon qilinib, tekshiruv natijalari bo‘yicha rasmiy munosabat berib boriladi.
Izoh (0)