O‘zbekiston tashqi ishlar vaziri vazifasini bajaruvchi Baxtiyor Saidov BMTning Inson huquqlari bo‘yicha Oliy komissari Volker Turk bilan uchrashdi. Bu haqda Saidov o‘zining Telegram’dagi kanali orqali ma’lum qildi.
“O‘zbekiston va BMT Inson huquqlari bo‘yicha Oliy komissar boshqarmasi o‘rtasidagi hamkorlikning istiqbolli yo‘nalishlarini muhokama qildik. Qayd etish joizki, so‘nggi yillardagi aloqalarimiz O‘zbekistonning inson huquq va manfaatlarini ta’minlashga qaratilgan islohotlarni davom ettirishda qat’iyligini namoyon etadi”, — deb yozadi TIV rahbari.
Tashqi ishlar vazirligining qayd etishicha, Volker Turk O‘zbekistonda amalga oshirilayotgan, jumladan, fuqarolarning qonuniy huquq va manfaatlarini taʼminlash, turmush farovonligini oshirishga qaratilgan islohotlarni ijobiy baholagan.
Oliy komissarga O‘zbekistonda boshlangan konstitutsiyaviy islohotlar haqida so‘nggi maʼlumotlar taqdim etilgan.
BMT Inson huquqlari bo‘yicha Oliy komissari O‘zbekistonga uch kunlik tashrifi davomida qator vazirlik va idoralarda hamda fuqarolik jamiyati vakillari bilan uchrashuv va muzokaralar o‘tkazishni rejalashtirgan.
Izoh (0)