Tatariston rahbari Rustam Minnixanov ishchi tashrif bilan O‘zbekistonga keldi. Tatariston OAVlari xabar bermoqda.
Ma’lum qilinishicha, Minnixanovni Toshkent xalqaro aeroportida bosh vazir o‘rinbosari Jamjid Xo‘jayev va Rossiyaning O‘zbekistondagi elchisi Oleg Malginov kutib olgan.
Tashrifning asosiy maqsadi — “Innoprom. Markaziy Osiyo” xalqaro sanoat ko‘rgazmasida ishtirok etish. Tadbirda 70 ta kompaniya qatnashmoqda, shuningdek, ko‘rgazma majmuasida Tatariston stendi ham tashkil etilgan.
Bundan tashqari, Rustam Minnixanov Qozon federal universitetining Jizzax shahridagi filialining yangi Tibbiy ta’lim markazi hamda “Jizzax” texnoparkining ochilishiga tashrif buyurishni rejalashtirgan.
Rustam Minnixanov 2022-yil oktabr oyida O‘zbekistonga amalga oshirgan tashrifida prezident Shavkat Mirziyoyev bilan uchrashgan edi. O‘shanda Tatariston bilan amaliy sheriklikni kengaytirish va iqtisodiyotning ustuvor tarmoqlarida qo‘shma innovatsion loyihalarni ilgari surish masalalari har tomonlama ko‘rib chiqilgan.
Izoh (0)