Sirdaryo viloyatida bolalarda uchraydigan genetik kasalliklarni aniqlash va tashxislashga ixtisoslashgan markaz faoliyati yo‘lga qo‘yiladi. Bu haqda “Yuz.uz” nashri xabar berdi.
Qayd etilishicha, O‘zbekiston—Xitoy qo‘shma loyihasi doirasida ishga tushirilishi rejalashtirilgan genetika markazi yiliga 5 ming nafar chaqaloqda 48 turdagi skrining tekshiruvlarni o‘tkazish, chaqaloqlarda tug‘ma va irsiy kasalliklarni erta bosqichlarda aniqlash va davolash imkonini beradi.
“Xitoyda, qolaversa dunyoning ko‘pgina mamlakatlarida bolalarda uchrayotgan genetik kasalliklarni aniqlash va tashxislashda o‘z nufuziga ega bo‘lgan BGl Genomies kompaniyasi bilan innovatsion loyihalar asosida hamkorlik aloqalarini o‘rnatganmiz. Sirdaryoga taqdim etayotgan yangi loyihamiz nogironlikka sabab bo‘luvchi genetik kasalliklarni aniqlashga va tashxislashga mo‘ljallangan bo‘lib, genetik kasalliklar sabab nogiron bo‘lib qoladigan bolalar sonini sezilarli darajada qisqartirish imkonini beradi”, — deydi Oliy taʼlim, fan va innovatsiya vaziri o‘rinbosari Shahlo Turdiqulova.
Shu maqsadda, viloyatga tashrif buyurgan BGl Genomies Xitoy kompaniyasining MDH davlatlari bo‘yicha vakili Jun Cheng xonim Oliy taʼlim Sirdaryo viloyat sog‘liqni saqlash boshqarmasi tizimidagi “Ona va bola” skrining markaziga tashrif buyurgan.
Ular u yerda, markaz faoliyatini ko‘zdan kechirib, bolalarda uchrayotgan genetik kasalliklarni erta bosqichlarda aniqlash va tashxislash yuzasidan Sirdaryoda olib borilayotgan ishlar bilan tanishib, kelgusida genetika sohasini Sirdaryoda rivojlantirish, 48 turdagi genetik kasalliklarni aniqlash va tashxislashga ixtisoslashgan markaz faoliyatini davlat-xususiy sherikchilik asosida yo‘lga qo‘yish masalasi yuzasidan Sirdaryo viloyat sog‘liqni saqlash boshqarmasi tizimi vakillari bilan fikr almashgan.
O‘zbekistonda 19-apreldan ilk marta “Bolaning sog‘lom ovqatlanish haftaligi” boshlandi. Haftalik doirasida 208 ta ko‘p tarmoqli markaziy poliklinika, 1 049 ta oilaviy poliklinika, 1 080 ta oilaviy shifokor punktining 17,3 mingta tibbiy brigadalari va 34,6 ming nafar patronaj hamshiralari tomonidan 1 million 878 ming nafardan ziyod 6-23 oylik bolalar uchun uy sharoitida tayyorlanadigan ovqatlarni boyitish maqsadida mikronutriyent kukunlari topshiriladi.
Izoh (0)