Аёлларни шаҳвоний эксплуатация қилиш мақсадида Россияга юбораётган аёл Наманган халқаро аэропортида қўлга олинди. Бу ҳақда ИИВ ахборот хизмати хабар берди.
Қайд этилишича, Наманган вилояти ИИБ Тезкор-қидирув хизмати томонидан Фарғона вилоятида яшовчи, муқаддам “одам савдоси” билан судланган аёл шаҳвоний мақсадларда фойдаланиш учун алдов йўли билан аёлларни ёллаб, Москвадаги таниши “Алёна” олдига юбориши тўғрисида олинган маълумотга асосан тезкор тадбир ўтказилган.
Тадбир давомида маълумотда номи келтирилган аёл Наманган шаҳри, Косонсой ва Учқўрғон туманларида яшовчи 3 нафар қиз-аёлга ўз ҳисобидан авиачипталарни расмийлаштириб, 16 апрель куни Наманган халқаро аэропорти орқали уларни жўнатиб юбормоқчи бўлган вақтида ушланган.
Терговга қадар текширув ҳаракатлари мобайнида яна икки нафар аёлни юбориш мақсадида паспортлар ҳамда авиачипталарни расмийлаштириш учун ҳужжатлар тўплагани аниқланган.
Ушбу аёлга нисбатан Наманган ИИО ФМБ ҳузуридаги Тергов бўлими томонидан Жиноят кодексининг 135-моддаси (одам савдоси) билан жиноят иши қўзғатилиб, ҳозирда тергов ҳаракатлари олиб борилмоқда.
Одам савдоси
Тошкент вилоятида қизларни Индонезияга фоҳишаликка юбормоқчи бўлганлар қамалгани тўғрисида хабар берилганди. Шунингдек, Самарқандда 29 ёшли фуқарони Дубайга фоҳишаликка юбораётган аёл ушлангани, Интерпол одам савдоси бўйича қидирувда бўлган аёлни БААдан Ўзбекистонга депортация қилгани маълум бўлганди.
Апрель ўрталарида эса ИИВ Тезкор-қидирув департаменти томонидан аёлларни хорижий валютада баҳолаб, интим хизматлар кўрсатиш учун шароит яратиб берган ҳамда ёш қизларни чет мамлакатларга олиб бориб, тазйиқ ва зўравонлик остида мажбуран шаҳвоний эксплуатация қилиб келган гуруҳлар фаолиятига чек қўйилган эди.
Изоҳ (0)