Namangan shahrida noqonuniy yer savdosi bilan shug‘ullangan shaxslar ushlandi, deb xabar beradi IIV matbuot xizmati.
Ma’lum qilinishicha, Namangan shahar Yangi Namangan tumani “Mehnatobod” mahallasida yashovchi fuqaro viloyat IIB boshlig‘i nomiga ariza bilan murojaat qilib, yer savdosi bilan shug‘ullanayotgan shaxslarning harakatlari qonuniyligini tekshirib berishni so‘ragan.
Yangiqo‘rg‘on tumanida joylashgan fermer xo‘jaligi balansida bo‘lgan 35 sotixli uzumzor bog‘ni 3 ming AQSH dollariga sotishini aytgan mazkur xo‘jalik rahbari tuman hokimligida ishlovchi tanishlari orqali hujjatlarni rasmiylashtirib berishni va’da qilgan. Hujjatlar uchun alohida 1,3 ming AQSH dollari, jami 4,3 ming AQSH dollari talab qilib kelgan fuqaroga nisbatan tezkor qidiruv tadbiri o‘tkazilgan.
Tezkor tadbirda ikki nafar shaxs arizachidan 34 million so‘m va alohida 6 million so‘m pullarni olib, bu haqida tilxat yozib bergan vaqtida ushlangan. Hozirda holat yuzasidan tergovga qadar tekshiruv harakatlari davom ettirilmoqda.
Noqonuniy yer savdosi
Shu yilning mart oxirlarida Navoiyda 80 gektar yerni 1 milliard so‘mga sotishga uringan shaxslar qo‘lga olingani, Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi. Shuningdek, Buxoroda hokimlik zaxirasidagi 10 sotix yerni sotishga uringan shaxs ushlangan, O‘zbekistonning ikki viloyatida yer maydonlarini noqonuniy sotmoqchi bo‘lganlar qo‘lga olingan edi.
Izoh (0)