O‘zbekiston Adliya vazirligiga 2023-yilning birinchi choragi davomida 355 ta normativ-huquqiy hujjat loyihasi huquqiy ekspertizadan o‘tkazish uchun kiritilgan. Bu haqda vazirlik matbuot kotibi ma’lum qildi.
Qayd etilishicha, ushbu normativ-huquqiy hujjat loyihalarining 59 tasi qonun hujjatlari, 101 tasi prezident hujjatlari, 195 tasi esa hukumat qarori loyihalari hisoblanadi. Birinchi chorakda kelib tushgan 355 ta normativ-huquqiy hujjat loyihalarining 312 tasi huquqiy ekspertizadan o‘tkazilgan.
Ulardan 187 ta hujjat loyihasining (60 foizga yaqin) huquqiy ekspertiza natijalari bo‘yicha ijobiy xulosa berilgan. 125 ta hujjat loyihasi amaldagi qonunchilik hujjatlari va yuridik texnika qoidalariga zid ekanligi, korrupsiyaviy omillar mavjudligi va boshqa e’tirozlar bilan, shuningdek, yana 43 ta loyiha reglament talablariga rioya qilinmagani bois ishlab chiquvchilarga qaytarilgan.
Adliya vazirligi tomonidan korrupsiyaga qarshi ekspertizadan o‘tkazilgan loyihalarning 52 tasida 82 ta korrupsiyaviy omil aniqlangan. Xususan, aniqlangan korrupsiyaviy omillarning:
- 5 tasi normalar barqarorligi va huquqiy muvofiqligi bilan bog‘liq;
- 39 tasi (48 foiz) vakolatlar, huquq va majburiyatlar bilan bog‘liq;
- 38 tasi (46 foiz) ma’muriy tartib-taomillar bilan bog‘liq korrupsiyaviy omillar hisoblanadi.
Hududiy adliya organlariga 2023-yil birinchi choragi davomida mahalliy davlat hokimiyati organlarining jami 866 normativ tusdagi qaror loyihalari kelib tushgan bo‘lib, ularning 477 tasiga e’tirozlarsiz rozilik xulosasi berilgan. 142 tasiga e’tirozlar bilan rozilik xulosasi berilgan, 46 tasi esa qonunchilik hujjatlariga nomuvofiqligi sababli qabul qilinishi maqsadga muvofiq emas deb topilgan, 213 tasi belgilangan talablarga rioya etilmay taqdim etilgani sababli huquqiy ekspertizadan o‘tkazilmasdan qaytarilgan.
Yanvar oxirlarida Transparency International xalqaro nodavlat tashkiloti tomonidan Korrupsiyani qabul qilish indeksi 2022-yil natijalari e’lon qilingandi. 180 ta davlat orasida O‘zbekiston 31 ball bilan 126-o‘rinni egalladi. Mamlakat ballarini 3 taga oshirib, o‘rnini 14 pog‘onaga yaxshilashga (2021-yilda 140 o‘rin) muvaffaq bo‘lgan.
Izoh (0)