Misr hukumati Rossiya qo‘shinlari uchun reaktiv snaryadlar ishlab chiqarish rejasidan voz kechdi. Bunday qaror AQSH aralashuvidan keyin qabul qilingan, deb yozmoqda The Washington Post gazetasi Amerika razvedkasining internetda tarqalgan maxfiy hujjatlariga tayanib.
Avvalroq o‘sha maxfiy hujjatlardan fevral oyida Misr prezidenti Abdul Fattoh as-Sisi Rossiyaga topshirish uchun yashirincha 40 mingta reaktiv snaryad ishlab chiqarish rejasini tayyorlashga ko‘rsatma bergani ma’lum bo‘lgandi.
Biroq mart oyi boshida Amerika rasmiylari, jumladan, Pentagon rahbari Lloyd Ostin Misrga tashrif buyurganidan so‘ng, Rossiyaga snaryad yetkazib berish rejasiga “pauza qo‘yilgan”.
Buning o‘rniga, deb yozadi The Washington Post, Misr Ukraina armiyasiga berish uchun AQSHga 152 va 155 millimetrli artilleriya snaryadlarini sotishga rozi bo‘lgan. Nashr buni Jo Bayden ma’muriyatining “ochiq diplomatik g‘alabasi” deb hisoblamoqda.
AQSH maxfiy hujjatlarining tarqalishi
So‘nggi haftada internetda AQSH razvedkasi va mudofaasiga oid bir qator maxfiy hujjatlar e’lon qilindi, ularda jumladan, Ukraina va Rossiya qo‘shinlarining holati haqida bayon qilingan. 13-aprel kuni AQSH rasmiylari hujjatlarni sizdirishda gumon qilib, harbiy-havo kuchlarining 21 yoshli xodimi Jek Teysheyrani hibsga oldi. Yigitning do‘stlari u urush boshlanganidan beri maxfiy hujjatlarni ulashib kelganini aytishdi.
12-aprel kuni Washington Post gazetasi Ukraina ob-havo sharoiti, uskunalar yetkazib berishning sekinligi, o‘q-dorilar taqchilligi va maxfiy hujjatlarning e’lon qilinishi tufayli bahorga rejalashtirilgan qarshi hujumni keyinga qoldirgani haqida yozdi. Ukraina bosh vaziri Denis Shmigal qarshi hujum yozda boshlanishi mumkinligini aytgan.
Pentagonning internetga sizdirilgan maxfiy hujjatida Ukraina armiyasi 30-aprel kuni qarshi hujum boshlashni rejalashtirgani aytilgan.
Izoh (0)