Germaniya sobiq kansleri Angela Merkel 17-aprel kuni Germaniyaning oliy davlat mukofoti – “Buyuk xizmatlari uchun” Federal Xoch ordeni bilan taqdirlandi. Undan oldin bu mukofotni faqat ikki nafar sobiq kansler olgan, deb yozadi Politico.
Merkel mukofotni mamlakat prezidenti Frank-Valter Shtaynmayerdan qabul qilib oldi. Shtaynmayer o‘zining yarim soatlik nutqida Merkelni Germaniyani og‘ir damlardan olib o‘tgan, jumladan 2008-yildagi moliyaviy inqiroz va 2015-yildagi qochqinlar inqirozini muvaffaqiyatli yenggan “misli ko‘rilmagan siyosatchi” deb atadi.
Sobiq kanslerning o‘zi bor-yo‘g‘i besh daqiqa gapirib, taklif va mukofot uchun minnatdorlik bildirdi, shuningdek, siyosatning yaxshi tomoni ham borligiga ishonch bildirdi.
Bunga qadar Federal xoch ordeni bilan faqat kansler Konrad Adenauer (1949—1963) va Gelmut Kol (1982—1998) taqdirlangan. Merkelni taqdirlash marosimi Germaniya prezidentining qarorgohi — Berlindagi Bellevyu saroyida bo‘lib o‘tdi. Tadbirda mamlakatning amaldagi kansleri Olaf Shols ham ishtirok etdi. Uning ta’kidlashicha, Merkel faoliyati doimo “faktlarga muvofiq, oddiy, pafossiz” bo‘lgan.
Shu bilan birga, Merkelning “Ittifoq” blokidagi ayrim partiyadoshlari (partiyadan hech kim taqdirlash marosimiga taklif qilinmagan) sobiq kansler siyosatdan ketganidan so‘ng mukofotni bu qadar tez, qolaversa, Rossiyaning Ukrainaga bosqini fonida qo‘lga kiritganidan noroziligini bildirgan.
Jumladan, partiyaning yuqori lavozimli xodimi Andreas Redder kanslerlik muddati tugaganidan bir yarim yil o‘tib Merkelning Federal Xoch ordeni bilan taqdirlanganini “noto‘g‘ri” deb atadi va uning Rossiyaga nisbatan pozitsiyasini Germaniyaning tashqi siyosatidagi eng yomon xatolaridan biri deb atadi.
Angela Merkel 2005-yildan 2021-yilgacha Germaniya kansleri lavozimida ishlagan. 2021-yil sentabrida u parlament saylovlarida qatnashishdan bosh tortdi va siyosatdan ketishini ma’lum qildi.
Izoh (0)