Tatariston rahbari Rustam Minnixanovning aytishicha, Moldova hukumati uni mamlakatga kiritmagan va “nomaqbul shaxs” deb e’lon qilgan. Minnixonovning videomurojaati Gagauznews Telegram-kanalida e’lon qilindi.
Videoda Minnixanov samolyot salonida o‘tirib, Kishinyovga Moldova avtonom hududi bo‘lgan Gagauziya rahbari lavozimiga nomzod Viktor Petrov va Moldova parlamenti deputati Aleksandr Suxodolskiyning taklifiga binoan kelganini aytadi.
“Afsuski, Moldova hukumati qarori bilan biz bu mamlakatga tashrif buyura olmaydigan nomaqbul fuqarolar deb topildik. Shuning uchun, afsuski, biz xalqlar do‘stligi kongressida qatnasha olmaymiz”, — deydi Tatariston rahbari.
Suxodolskiyning “TASS”ga aytishicha, Minnixanov Kishinyovga Moldova parlamenti deputatlari va Gagauziya parlamenti a’zolari taklifiga binoan uchib kelgan. “Men Minnixonovni barcha hujjatlar bilan aeroportda kutayotgan edim. Kishinyov aeroportida uni samolyotdan tushirishga ham ruxsat berishmadi. Kirish taqiqlangani to‘g‘risidagi hujjatni topshirishdi”, — dedi deputat.
Qayd etilishicha, Minnixanov Gagauziyaga “Xalqlar do‘stligi – 2023” xalqaro kongressi uchun kelgan. Moldovada siyosatchiga hamrohlik qilgan “Ak-Bars” xolding kompaniyasi rahbari Ivan Yegorov ham “nomaqbul shaxs” deb tan olingan, tadbirkor va Tatariston rahbari o‘tirgan samolyot Kishinyovdan Rossiyaga qaytib ketgan.
Moldova Minnixonovning tashrifi avvaldan kelishilmaganini da’vo qilmoqda
Ayni paytda, “Interfaks” axborot agentligi Moldova chegara politsiyasi matbuot kotibi Raisa Novitskiyning so‘zlariga tayanib, yozishicha, “Tatariston delegatsiyasining kelishi Moldova hukumati bilan kelishilmagan, Gagauziya avtonom maʼmuriyati esa xalqaro forum o‘tkazishni rejalashtirmayapti”.
Hozirda Gagauziyada muxtoriyatning yangi rahbarini saylash uchun saylov kampaniyasi davom etmoqda. Saylovlar 30-aprelga belgilangan. Ularda 8 nafar nomzod ishtirok etadi. Ularning barchasi rossiyalik siyosatchilarning qo‘llab-quvvatlovini olish uchun harakat qilmoqda, chunki Gagauziya Rossiya bilan yaqinlashish tarafdori, deb eslatdi “Interfaks”.
Izoh (0)